Kreditimi i biznesit është rritur në pjesën e parë të këtij viti, ndërsa shpërndarja sektoriale vazhdon të dëshmojë një orientim kryesisht te tregtia, shërbimet dhe ndërtimi.
Të dhënat e Bankës së Shqipërisë tregojnë se për katër muajt e parë të vitit 2026 sektori bankar dha gjithsej 92.8 miliardë lekë kredi të reja për biznesin, në rritje me 11.4% krahasuar me të njëjtën periudhë të vitit të kaluar.
Tregtia ngelet dominuese në strukturën e kredisë për ekonominë dhe ka shënuar rritje të lartë edhe për muajt e parë të këtij viti. Në katër muaj, kredia e re për tregtinë arriti në 36.2 miliardë lekë, në rritje me 25.5% krahasuar me të njëjtën periudhë të një viti më parë. Kredia për tregtinë përbën tashmë 39% të vlerës së kredisë së re, të disbursuar gjatë vitit, në rritje të mëtejshme nga nivelet e vitit të kaluar.
Megjithëse kërkesa e brendshme ka shfaqur sinjale dobësie, turizmi po e kompenson pjesërisht këtë efekt dhe po bën që shërbimet e lidhura me të, sidomos tregtia, të kenë një rol në rritje në ekonominë shqiptare pas pandemisë.
Sektori i dytë më i kredituar i ekonomisë ishte industria përpunuese, me 13.1 miliardë lekë, por në rënie me 4.4% krahasuar me një vit më parë. Pas një ecurie pozitive vitin e kaluar, kredia e re për industrinë përpunuese paraqitet në rënie këtë vit. Industria në tërësi dhe ajo përpunuese në veçanti kanë shfaqur një ecuri të dobët të prodhimit në vitet e fundit dhe kjo po fillon të reflektohet edhe në shifrat e huadhënies.
Sektori i tretë më i kredituar i ekonomisë është ndërtimi, me një vlerë kredie të re prej 11.7 miliardë lekësh. Vlera e kredisë së re për ndërtimin u rrit me 11% krahasuar me të njëjtën periudhë të një viti më parë, ritëm i ngjashëm me rritjen mesatare të kredisë së re për biznesin. Huaja e re për ndërtimin përbën rreth 12.5% të huasë totale për bizneset, në linjë me ecurinë e vitit të kaluar.
Ndërkohë, rritje të ndjeshme të kreditimit në muajt e parë të 2026 kanë shënuar edhe aktivitetet e pasurive të paluajtshme. Kredia e re në këtë sektor arriti në 3.7 miliardë lekë, me rritje vjetore prej 110%.
Rritja vazhdon të shfaqë edhe sektori që përfshin akomodimin dhe shërbimi ushqimor. Kredia e re arriti në 7.6 miliardë lekë, në rritje vjetore me 78%. Pesha në strukturën e kredisë për biznes u rrit në 8.2%, nga 5.1% një vit më parë. Rritja e kredisë për këtë sektor duket se reflekton kërkesën ende të lartë për investime të lidhura me sektorin e turizmit, kryesisht në hoteleri dhe kapacitete akomoduese.
Për t’u përmendur këtë vit është edhe kthimi i rritjes së kreditimit të sektorit energjetik, që vitin e kaluar kishte pësuar një rënie të fortë. Për katër muajt e parë të këtij viti, kredia e re për energjetikën arriti në 4.5 miliardë lekë, në rritje me 114% krahasuar me një vit më parë.
Sektori i bujqësisë edhe këtë fillim vitit regjistroi kreditim në vlera modeste, me 393 milionë lekë ose 26% më pak krahasuar me një vit më parë.
Kredia për bujqësinë po vazhdon të tkurret, pavarësisht aplikimit të skemave të ndryshme të lehtësimit të financimit, duke përfshirë një program të sigurimit të fondeve me çmim preferencial, të hartuar nga Banka e Shqipërisë dhe një skemë të re të garancisë sovrane për kreditë, të aplikuar nga qeveria shqiptare. /Monitor
