Indeksi i Pronave i publikuar nga Deloitte sjell të dhëna të detajuara mbi strukturën e banesave të reja në disa qytete europiane.
Në të gjithë Europën, madhësia mesatare dhe konfigurimi i apartamenteve të reja pasqyrojnë një ekuilibër midis kërkesës së tregut, rregulloreve të planifikimit urban, dendësisë dhe preferencave kulturore.
Megjithëse vërehet një trend i përgjithshëm drejt planimetrive më të vogla dhe më efikase por sërish dallimet rajonale mbeten të theksuara, duke reflektuar karakteristikat e ndryshme të zhvillimit urban në çdo vend.
Raporti ka fokusuar vëmendjen tek tre qytetet kryesore shqiptare: Tirana, Durrësi dhe Vlora. Në këto qytete, shumica e banesave të reja janë të tipit 1+1 ose 2+1, në madhësinë 50-80 m², me kuzhina dhe ballkone me plan të hapur. Ashensorët dhe parkimi janë të zakonshëm në projektet më të fundit.
Përveç kësaj, theksi mbetet tek aksesueshmëria, drita natyrale, hapësira e mirë brenda apartamentit dhe efikasiteti energjetik, duke e bërë banesën të re të përshtatshme për jetesën moderne.
Një nga arsyet pse në Shqipëri banesat janë më të mëdha është edhe për faktin se jetojmë në familje me më shumë anëtarë.
Të dhënat nga Censi tregojnë se Berati ka peshën më të lartë të banesave të vogla, nën 40 m², ndërsa Durrësi kryeson me banesat më të mëdha, mbi 130 m², që përbëjnë 4% të totalit.
Shkodra, Tirana, Dibra dhe Vlora ndjekin Durrësin në renditjen e banesave të mëdha, ndërsa Berati dhe Kukësi kanë peshën më të ulët.
Kur krahasohen të dhënat shqiptare me qytete të tjera europiane, Shqipëria rezulton e pozicionuar mirë. Sipërfaqja mesatare e banesave në vend tejkalon qytete si Budapesti (55-70 m²), Bratislava (64,2 m²), Ljubljana (52-54 m²) Beogradi (61 m²) dhe Parisi (50-70 m²).
Mesatarja e sipërfaqeve të banesave në Shqipëri është e ngjashme me disa qytete të Europës veriperëndimore.
Ndërkohë, shteti që ka sipërfaqen më të madhe për banesat është Portugalia, ku mesatarisht banesat në Lisbonë dhe Porto janë 119 m² dhe 104 m². Po ashtu, nuk mbetet mbrapa Roma (92,4 m²), Firence (96,6 m²) dhe Milano (81 m²), të gjitha me sipërfaqe banesash mbi 80 m²./tvscan
