Në fillim të vitit 2025, askush nuk do t’i kishte lidhur fjalët “Dubai” dhe “çokollatë”. Por dhjetë muaj më vonë, variacione të çokollatës së mbushur me fistikë mund të gjenden pothuajse në çdo supermarket.
Por çfarë e bën që disa ushqime, si çokollata e Dubait apo çaji “Bubble Tea” të “shpërthejnë” dhe të kthehen në dëshirën e të gjithëve?
Sipas profesor Charles Spence, ekspert i psikologjisë eksperimentale në Universitetin e Oksfordit, gjithçka lidhet me fuqinë e rrjeteve sociale dhe influencuesve.
“Influencuesit janë gjithmonë të etur të na tregojnë ushqimin më të ri që kanë zbuluar diku në botë,” shpjegon ai. “Në rastin e çokollatës së Dubait, është kontrasti i gjallë mes ngjyrës jeshile të fistikut dhe kafes së çokollatës që e bën atë të dallohet.”
Sipas tij, pamja unike është një faktor vendimtar: “Ajo kombinim ngjyrash bën që kushdo që e sheh postimin në Instagram të kuptojë menjëherë se ke diçka ndryshe.”
I njëjti efekt vizual, shton Spence, ka ndikuar në popullaritetin e Aperol Spritz dhe verës roze, pije që shumë njerëz i konsumojnë “sepse duken bukur në foto, jo domosdoshmërisht për shijen e tyre”.
Profesori pranon me humor se ka provuar edhe vetë çokollatën e Dubait:
“E bleva për kërkim shkencor… por pjesa tjetër e tabletës është ende në frigorifer. Nuk munda ta përfundoj.”
Sipas tij, këto trende ushqimore janë të drejtuara nga brezat e rinj dhe nga dëshira për diçka ekzotike. “Është ajo ndjesi e të qenit zbulues i shijes më të re, përvojës më të re,” shprehet ai.
Sa për trendin e ardhshëm? Spence nuk është i sigurt. “Ndoshta jam pak jashtë asaj gjenerate që e ndjen menjëherë pulsin e rrjeteve sociale,” thotë ai me të qeshur.
Por një gjë mbetet e qartë: për të shpërthyer në rrjete, një ushqim duhet të duket ndryshe, të jetë unik dhe fotozhenik. /Skyweb.al
