Gjigandi i aviacionit Boeing ka njoftuar se prodhimi i avionëve të shumëpritur 777X do të shtyhet deri në vitin 2027, duke i kushtuar kompanisë rreth 5 miliardë dollarë nga penalitete për vonesat e dorëzimit.
Kompania amerikane bëri të ditur se vonesat janë shkaktuar nga rritja e kërkesave rregullatore që duhet të përmbushë përpara se modeli të marrë dritën jeshile për prodhim të plotë.
Ky zhvillim vjen në një periudhë të rritjes së kërkesës për udhëtime ndërkombëtare, në të cilën Boeing synon të promovojë 777X si pasardhësin modern të modeleve të njohura 747 dhe 777, që kanë qenë ndër më të preferuarat nga linjat ajrore botërore, raporton BBC.
Boeing, që po përpiqet të rifitojë besimin pas një sërë incidentesh serioze, përfshirë rastin e një dere që u shkëput gjatë fluturimit, raportoi se të ardhurat për tremujorin që përfundoi në shtator u rritën me 30%, duke arritur në 23.27 miliardë dollarë krahasuar me të njëjtën periudhë të vitit të kaluar. Shefi ekzekutiv Kelly Ortberg tha se kompania po punon për të “rikthyer besimin e të gjithë palëve të interesuara” dhe se ishte i zhgënjyer nga vonesa e 777X, megjithëse theksoi se “avioni po performon mirë gjatë testimeve në fluturim”. Ai shtoi se Boeing po punon për të “stabilizuar operacionet dhe për të rikuperuar plotësisht performancën e kompanisë”.
Përveç kritikave për çështje sigurie në vitet e fundit, kompania është përballur edhe me greva të punonjësve për pagat dhe kushtet e punës. Më shumë se 3,000 punëtorë në dy njësi të mbrojtjes në SHBA dolën në grevë në gusht, ndërsa vitin e kaluar një grevë prej rreth 30,000 punëtorësh në sektorin e avionëve pasagjerë mbaroi pas shtatë javësh.
Ortberg është zotuar më herët se do të “rikthejë besimin” në kompani, do të ndryshojë kulturën korporative dhe do të vendosë sigurinë e pasagjerëve si prioritet kryesor.
Në raportin e fundit financiar, Boeing njoftoi se kishte dorëzuar 55 avionë në shtator, një rritje krahasuar me vitin e kaluar, kur grevat kishin ulur ndjeshëm prodhimin dhe i kishin shkaktuar kompanisë humbje të mëdha.
Boeing pret që dorëzimet e modelit 777X të nisin në vitin 2027, çka pritet të përmirësojë ndjeshëm rrjedhën e parasë së kompanisë. Deri tani, vonesat e këtij projekti kanë shkaktuar gati 15 miliardë dollarë (11.3 miliardë paund) në kosto shtesë.
Kompania thotë se modeli 777X do të jetë më efikas se konkurrentët, do të gjenerojë më shumë të ardhura për linjat ajrore dhe do të ofrojë “besueshmërinë më të lartë në klasën e tij”, me ajër më të pastër në kabinë dhe një “udhëtim më të qetë” për pasagjerët. /Skyweb.al
