Pamjet që qarkullojnë në rrjetet sociale, ku pretendohet se një avion i kompanisë Wizz Air ka marrë flakë në aeroportin e Rinasit, janë të pavërteta dhe të prodhuara me inteligjencë artificiale.
Nga verifikimet e Skyweb.al rezulton se imazhet nuk përkojnë me asnjë ngjarje reale të ndodhur në aeroportin e Tiranës.
Një nga elementet kryesorë që dëshmon manipulimin është vendndodhja e gomave: Avionët Airbus A320 apo A321, që përdor Wizz Air, i kanë gomat më pranë pjesës qendrore të trupit dhe jo, siç shihet në foton e rreme.
Gjithashtu, në rast emergjence reale, të gjitha dyert do të ishin të hapura bashkë me platformat rrëshqitëse, ndërsa në imazhin e shpërndarë duket e hapur vetëm dera e përparme, një tjetër tregues që fotoja është e gjeneruar me AI.
Krahas kësaj, në rast zjarri real motorët nuk dëmtohen në atë formë. Instalimi i tyre në krahë është projektuar që në rast goditjeje, të shkëputen për të ruajtur strukturën e krahut të padëmtuar.
Një detaj tjetër që konfirmon manipulimin është këndi i dritës poshtë avionit, i cili nuk përputhet me prozhektorin sipër.
Nga verifikimet që Skyweb.al bëri në FlightRadar nuk rezulton asnjë fluturim i anuluar apo shtyrë, gjë që ndodh në raste emergjencash tsi ajo e pretenduar përmes manipulimit të mësipërm.
Siç konfirmoi edhe TIA, gjithçka shkon normalisht në Rinas.
IMAZH I PAVERTETE
Ndërkohë, Aeroporti Ndërkombëtar i Tiranës reagoi duke sqaruar se lajmet për zjarr apo incident janë montim dhe janë krijuar për të përhapur panik.
“Operimet në Aeroportin Ndërkombëtar të Tiranës vazhdojnë normalisht dhe pa asnjë incident. Siguria e pasagjerëve dhe e fluturimeve është dhe do të mbetet prioriteti ynë kryesor,” – thuhet në reagimin zyrtar të aeroportit.
Skyweb.al apelon për kujdes ndaj përmbajtjeve të tilla mashtruese që synojnë keqinformimin e publikut.
