Shqipëria nuk është ende e përgatitur për të nisur zbatimin e programit IPARD III, që synon financimin e zhvillimit rural përmes fondeve të Bashkimit Europian. Kështu theksohet në progres-raportin më të fundit të Komisionit Europian për vendin tonë.
Në dokument thuhet se “është e nevojshme të rritet kapaciteti dhe mbikëqyrja për të nisur dorëzimin dhe zbatimin efikas të IPARD III, në përputhje të plotë me parimet e menaxhimit të shëndoshë financiar”. Komisioni vëren gjithashtu se nuk është bërë përparim në përafrimin e legjislacionit për politikën e cilësisë me acquis-in e BE-së.
Sipas vlerësimit, Shqipëria duhet të forcojë institucionet që menaxhojnë fondet e zhvillimit rural, duke siguruar transparencë, mbikëqyrje dhe llogaridhënie në procesin e zbatimit.
Komisioni nënvizon gjithashtu se organet përgjegjëse për IPARD-in janë të detyruara të parandalojnë, zbulojnë dhe raportojnë çdo parregullsi, në mënyrë që fondet të mos rrezikohen nga korrupsioni apo keqpërdorimi.
Programi IPARD III, me një fond total prej mbi 112 milionë eurosh të bashkëfinancuar nga BE dhe qeveria shqiptare, mbetet ende i bllokuar, duke vonuar investimet për fermerët dhe sipërmarrjet bujqësore që synojnë modernizimin e sektorit rural. /skyweb.al
