Në një workshop për kërkime ekonomike në Evropën Juglindore, guvernatori i Banka e Shqipërisë, Gent Sejko, vuri në dukje se përshpejtimi i përdorimit të inteligjencës artificiale (AI) në ekonomi dhe tregje financiare paraqet një sfidë të re komplekse për sistemin financiar dhe politikat monetare.
Ai nënvizoi se ndërkohë që situata makroekonomike në Shqipëri duket pozitive, ekonomia është e ekspozuar ndaj ndryshimeve strukturore, demografike dhe teknologjike që kërkojnë një qasje të bazuar në analiza të thelluara dhe vendimmarrje të kujdesshme.
“Inovacioni i vrullshëm teknologjik, i shoqëruar me përdorimin në rritje të inteligjencës artificiale, po transformon mënyrën se si funksionojnë ekonomitë dhe tregjet financiare. Nga ana tjetër, zhvillimet demografike jo të favorshme dhe ndryshimet strukturore në tregun e punës po e bëjnë mjedisin ekonomik më të ndërlikuar.
Të gjitha këto trende po i vendosin sistemet financiare dhe politikat monetare e ekonomike përballë sfidave të reja dhe risive komplekse, të cilat kërkojnë analiza të thelluara, kuptim më të mirë të veprimeve ndërsektoriale dhe vendimmarrje të bazuar në prova e rigorozitet shkencor. Për këtë arsye, Banka e Shqipërisë ka investuar në ndërtimin e një ekosistemi të qëndrueshëm kërkimor, ku analizat makroekonomike mbështesin jo vetëm politikën monetare dhe atë makroprudenciale, por edhe ndërtimin e strategjive dhe hartimin e politikave afatgjata”, tha guvernatori Sejko.
