Nga Skyweb.al
Behgjet Pacolli bëri mbrëmë një deklaratë të çuditshme, duke vënë në dyshim aftësinë e tij për të lexuar dhe kuptuar atë që lexon, ndërsa duket se përmes kësaj manovre po tenton të bëjë “nul” firmën në një dokument që më pas ka shërbyer për kalimin e 47 për qind të aksioneve të “Vlora International Airport” te Valon Ademi.
Përmes disa shpjegimeve të vagullta që nuk lidhen me realitetin dhe kapacitetet procesuese të informacionit që duhet të ketë një biznesmen i kalibrit të tij, Pacolli tha në “Opinion” se nuk njihte dokumentin e firmosur pranë noteres në Tiranë, përmes të cilit Valon Ademi merr aksionet si kundërvlerë e punës së kryer në aeroportin e Vlorës.
Pacolli akuzon Valon Llukën, ish-administrator i aeroportit, se ka keqpërdorur firmën e tij.
Sipas Pacollit, ai është telefonuar nga Lluka, i cili i ka kërkuar të firmosë një dokument që e autorizonte të kryente veprime në bankë, dhe ai e ka firmosur pa e parë përmbajtjen.
“Ishe me pushime në Vala Mar Lalëz, më merr Valon Lluka nga Prishtina dhe më kërkon firmën për disa veprime në bankë. Erdhi shoferi me një dosje, thava duart me peshqir dhe firmosa, por nuk e pash çfarë firmosa,” deklaroi Pacolli.
Ai shtoi se dy vite më vonë ka zbuluar se bëhej fjalë për një kontratë që parashikonte transferimin e aksioneve në prill 2025.
Familja Pacolli është kujdesur të marrë edhe një dëshmi nga shoferi, i cili konfirmon se Behgjet Pacolli firmosi pa e lexuar dokumentin.
Dëshmia është marrë më datë 25 gusht, pasi shpërtheu skandali i përplasjes me aksionerëve të Aeroportit të Vlorës.
Firmosja e një dokumenti pa ditur se çfarë përmban ai, siç pretendon Pacolli, është një nga deklaratat më të çuditshme të ndonjë biznesmeni, e thënë lehtësisht në një intervistë televizive nga një prej sipërmarrësve më të mëdhenj shqiptarë, në një tentativë për ta paraqitur veten si të mashtruar në kushtet e padijes nga kjo histori skandali në aeroportin e Vlorës.
Pacolli pranoi gjithashtu se nuk e di saktësisht sa para janë harxhuar në ndërtimin e aeroportit dhe se me Valon Ademin kishin një marrëveshje gojore për të ndarë aksionet në bazë të shpenzimeve të secilit pas përfundimit të projektit.
Por ka edhe më! Dy biznesmenës nisen për të investuar sëpaku 140 milionë euro dhe raportin e ngrenë në një marrëveshje gojore dhe jo mbi dokumente!
“Ka pasur një bisedë, se pas përfundimit të aeroportit, do shihej investimi dhe do diskutohej sa aksione do kishte secili”, shtoi Behgjet Pacolli.
Të dy, si Valon Ademi ashtu edhe Behgjet Pacolli, përmes aferave mes tyre dhe përplasjes me autoritetet shqiptare për çështjen e aksioneve si edhe për çështje që nuk guxojnë t’i flasin publikisht, kanë marrë peng një investim strategjik për shqiptarët, ndërkohë që kishin ofruar shumë më tepër për ndërtimin krahasuar me kompaninë angleze që e mori përsipër projektin për 80 milionë euro.
Thonë se hajdutët nuk grindën kur vjedhin, por kur ndajnë. Urojmë të mos jetë ky rasti! /skyweb.al
