Një rishikim i gjerë shkencor i botuar në British Medical Journal ka hedhur poshtë pretendimet se përdorimi i paracetamolit gjatë shtatzënisë mund të rrisë rrezikun që fëmijët të zhvillojnë autizëm ose çrregullim të hiperaktivitetit me deficit vëmendjeje (ADHD).
Ky publikim erdhi pas debatit të ndezur në SHBA, ku administrata e presidentit Donald Trump kishte paralajmëruar gratë shtatzëna të shmangnin paracetamolin, i njohur edhe si acetaminofen ose Tylenol, duke e lidhur atë me rritjen e rasteve të autizmit. Në një fjalim në Shtëpinë e Bardhë, Trump u kërkoi grave që “të luftonin me çdo kusht për të mos marrë” këtë ilaç, gjë që ngjalli reagime të forta nga komuniteti mjekësor.
Analiza e kryer nga një grup studiuesish të Universitetit të Liverpoolit nuk gjeti asnjë provë të besueshme që të lidhte përdorimin e paracetamolit gjatë shtatzënisë me autizmin apo ADHD-në tek fëmijët.
Rishikimi përfshiu nëntë meta-analiza që përmbledhnin rreth 40 studime vëzhguese mbi efektet e mundshme të këtij ilaçi në zhvillimin neurologjik të fëmijëve. Sipas autores kryesore, profesoreshës Shakila Thangaratinam, cilësia e shumë prej studimeve ekzistuese ishte “e ulët ose kritikisht e ulët”.
Ajo thekson se çdo lidhje e dukshme mes përdorimit të paracetamolit dhe diagnozave të autizmit “ka shumë gjasa të shpjegohet nga faktorë gjenetikë ose nga gjendja shëndetësore e nënës, dhe jo nga vetë ilaçi”.
“Gratë duhet të dinë se provat aktuale nuk mbështesin një lidhje reale midis paracetamolit dhe autizmit apo ADHD-së,” – deklaroi Thangaratinam për The Guardian.
“Nëse një grua shtatzënë ka ethe apo dhimbje, përdorimi i paracetamolit mbetet i rekomanduar, pasi ethet e larta mund të jenë shumë të rrezikshme për beben.”
Ajo shtoi gjithashtu se alternativa si ibuprofeni nuk rekomandohen gjatë shtatzënisë. /Skyweb.al
