Në kuadër të 100-vjetorit të krijimit të Bankës së Shqipërisë, guvernatori Gent Sejko prezantoi një monedhë të re përkujtimore me vlerë 100 lekë, e cila është përgatitur posaçërisht për këtë vit jubilar.
“Monedha është numizmatike, pa kurs ligjor. Në njërën anë paraqitet figura e një djali fshatar dhe poetit Asdreni, ndërsa në anën tjetër ndodhet shenja e 100-vjetorit të Bankës së Shqipërisë,” deklaroi Sejko gjatë fjalës së tij në konferencën përkujtimore.
Kjo monedhë nuk do të hidhet në qarkullim, por do të mbetet një simbol i rëndësishëm historik që nderon rrugëtimin njëqindvjeçar të institucionit më të lartë financiar në vend.
Banka e Shqipërisë, sipas ligjit, ka të drejtën të emetojë kartëmonedha, monedha dhe medaljone për qëllime numizmatike, të cilat shërbejnë për të përkujtuar ngjarje dhe personalitete që kanë lënë gjurmë në historinë kombëtare.
Tradita e monedhave përkujtimore në Shqipëri daton që prej vitit 1926, kur Banka Kombëtare shtypi për herë të parë monedhën 20 Franga Ar, në kujtim të “Paktit të Miqësisë dhe Sigurisë” mes Italisë dhe Shqipërisë. Po ashtu, në vitin 1921 u hodh në qarkullim kartëmonedha “20 Skënder”, e cila përkujtonte konfirmimin e kufijve të Shqipërisë në Konferencën e Ambasadorëve në Paris.
Monedha e re e prezantuar nga Sejko, me elemente artistike e simbolike kombëtare, përbën vazhdimësinë e kësaj tradite historike të përkujdesjes për trashëgiminë monetare dhe identitetin kombëtar.
