Komisionet parlamentare kanë miratuar projektligjin që i hap rrugë marrëveshjes së garancisë me Bankën Evropiane për Rindërtim dhe Zhvillim (BERZH), duke mundësuar financimin e një prej projekteve strategjike të Korporatës Elektroenergjetike Shqiptare (KESH) për zgjerimin dhe diversifikimin e burimeve të energjisë elektrike në vend.
Sipas dokumentit, projekti parashikon ndërtimin e një centrali diellor prej 50 MWp në zonën e Belshit, në territorin e Bashkisë me të njëjtin emër.
Impianti do të shtrihet në një sipërfaqe prej rreth 60 hektarësh, ndërsa një linjë e re 110 kV, me gjatësi rreth 9 kilometra, do ta lidhë me rrjetin ekzistues në nënstacionin e Kajanit, i cili do të zgjerohet si pjesë e projektit.
Kostoja totale e investimit arrin në 40 milionë euro. Nga këto, 30 milionë euro do të sigurohen përmes kredisë së BERZH-it, për të cilën shteti shqiptar është angazhuar si garantues sovran.
Në prill të këtij viti, Bordi i BERZH-it miratoi zyrtarisht kredinë me garanci shtetërore.
Përveç financimit të huasë, projekti do të mbështetet me një grant prej 8 milionë euro nga Korniza e Investimeve të Ballkanit Perëndimor (WBIF) dhe me 2 milionë euro injeksion kapitali nga KESH.
Sipas parashikimeve, centrali diellor në Belsh do të gjenerojë rreth 1% të prodhimit vjetor kombëtar të energjisë elektrike, duke kontribuar ndjeshëm në rritjen e kapaciteteve të burimeve të rinovueshme dhe në reduktimin e varësisë nga prodhimi hidroenergjetik.
Projekti konsiderohet një hap i rëndësishëm në strategjinë kombëtare për energjinë e pastër dhe sigurinë afatgjatë të furnizimit, në linjë me objektivat e tranzicionit energjetik të Bashkimit Evropian. /skyweb.al
