Pavarësisht se në Shqipëri lindin më shumë djem se vajza, në popullsinë totale numri i grave është më i lartë se ai i burrave. Sipas të dhënave të INSTAT, në fund të vitit 2025 në vend jetonin 1,181,981 gra dhe 1,153,949 burra, një diferencë prej rreth 28 mijë personash në favor të grave.
Raporti gjinor në lindje vijon të jetë në favor të djemve. Në Shqipëri lindin mesatarisht 108 djem për çdo 100 vajza, duke ruajtur një prirje të qëndrueshme të dominimit të meshkujve në lindje.
Megjithatë, ky raport ndryshon me kalimin e moshës. Emigracioni më i lartë i meshkujve, së bashku me jetëgjatësinë më të madhe të grave, janë ndër faktorët kryesorë që ndikojnë në përmbysjen e raportit gjinor në popullsinë e përgjithshme.
Avantazhi numerik i grave vihet re edhe në arsim. Sipas të dhënave, rreth 65% e grave janë me arsim të lartë, duke treguar një pjesëmarrje të konsiderueshme të tyre në nivelet më të larta të edukimit.
Në politikë, megjithatë, përfaqësimi i grave mbetet më i ulët. Gratë përbënin rreth një të tretën e deputetëve në Kuvend, duke reflektuar një hendek mes peshës së tyre në popullsi dhe përfaqësimit në institucionin më të lartë ligjvënës të vendit.
