13 projekte për impiante fotovoltaike kanë marrë leje zhvillimi ose ndërtimi nga Këshilli Kombëtar i Territorit dhe Ujit, sipas mbledhjes së fundit të publikuar më 29 shtator. Këto leje parashikojnë një kapacitet të instaluar total prej 302 megavatësh, duke shënuar një tjetër hap përpara në diversifikimin e burimeve të energjisë në vend.
Projektet janë private dhe të pavarura, pra nuk përfitojnë nga masat mbështetëse të qeverisë dhe janë konceptuar për shitjen e energjisë në tregun e lirë.
Më i madhi prej tyre është impianti 62 MW në Kolonjë, i zhvilluar nga kompania Fortis Energy & Construction, ndërsa një tjetër me 30 MW do të ndërtohet në Fier.
Në Ersekë, kompania Erseka Solar Park ka marrë leje për dy lote të reja që zgjeron projektet ekzistuese, ndërsa në Porto Palermo është miratuar një impiant 2 MW nga Sea Solar Energy.
Në listë përfshihen gjithashtu projekte të tjera me kapacitete të vogla, disa prej të cilave do të kenë çmim të rregulluar nga Enti Rregullator i Energjisë dhe do të blehen nga shteti.
Aktualisht, në Shqipëri janë disa impiantë fotovoltaikë aktivë, të cilët po rrisin gradualisht peshën e energjisë diellore në raport me prodhimin kombëtar. Megjithatë, përqindja mbetet ende modeste, dhe autoritetet e presin diversifikimin e plotë energjetik vetëm në një periudhë afatmesme, në varësi të ritmit të zhvillimit të këtyre projekteve.
Impianti më i madh në prodhim në vend mbetet Karavastaja, me një kapacitet prej 140 MW, ndërsa pritet që Belshi, Fier, Kolonja dhe Erseka të bëhen qendrat kryesore të prodhimit diellor në vitet në vijim.
Lista e projekteve përfshin kompani si Glow Solar, Voltz Solar, Erseka Solar Park, Gjorica Solar Park, Fortis Energy & Construction, Power Energy, Prosol Solar, EZ-5 Solar Park 2, Gemtech Solar Park, Dion Energji dhe të tjera.
Në total, këto investime përfaqësojnë një valë të re zhvillimi në energjinë e rinovueshme, duke sinjalizuar një interes të shtuar të sektorit privat për të hyrë në tregun energjetik shqiptar.
Lista e plotë e projekteve me vendndodhjet e tyre, sipas vendimeve të fundit të Këshillit Kombëtar të Territorit dhe Ujit:
-
Glow Solar sh.p.k. – Ndërtimi i impiantit fotovoltaik me fuqi 29.13 MW, Bashkia Gramsh.
-
Voltz Solar sh.p.k. – Ndërtimi i impiantit fotovoltaik me fuqi 15.2 MW, Bashkia Gramsh.
-
Erseka Solar Park 3 Lot 1 sh.p.k. – Ndërtimi i impiantit fotovoltaik me fuqi 42.315 MW, Bashkia Ersekë.
-
Erseka Solar Park 3 Lot 2 sh.p.k. – Ndërtimi i impiantit fotovoltaik me fuqi 21.21 MW, Bashkia Ersekë.
-
Sea Solar Energy sh.p.k. – Ndërtimi i impiantit fotovoltaik me fuqi 2 MW, Porto Palermo, Bashkia Himarë.
-
Gjorica Solar Park sh.p.k. – Ndërtimi i impiantit fotovoltaik me fuqi 40 MW, Bashkia Bulqizë.
-
Power Energy sh.p.k. – Ndërtimi i impiantit fotovoltaik me fuqi 25 MW, Bashkia Fier.
-
G.A.C sh.p.k. – Ndërtimi i impiantit fotovoltaik me fuqi 2 MW, Bashkia Elbasan.
-
Gemtech Solar Park sh.p.k. – Ndërtimi i impiantit fotovoltaik me fuqi 10 MW, Bashkia Fier.
-
Dion Energji sh.p.k. – Ndërtimi i impiantit fotovoltaik me fuqi 2 MW, Bashkia Fier.
-
Fortis Energy & Construction sh.p.k. – Ndërtimi i impiantit fotovoltaik me fuqi 62 MW, Bashkia Kolonjë.
-
EZ-5 Solar Park 2 sh.p.k. – Ndërtimi i impiantit fotovoltaik me fuqi 30 MW, Bashkia Fier.
-
Prosol Solar sh.p.k. – Ndërtimi i impiantit fotovoltaik me fuqi 21 MW, Bashkia Fier.
