“Thashë të vija edhe unë me ju, mos bëja ndonjë plaçkë”, është thënia lapidar e Birçe Haskos në filmin “Liri a vdekje”, teksa përpiqet të bindë çetën e Çerçiz Topullit që ta marrin me vete në plaçkitjet e hamendësuara nga mendja e një bariu që nuk dinte as shkrim e as këndim.
Një mendësi e tillë rikthehet në vëmendjen e shqiptarëve shumë dekada më vonë, pikërisht në njërin prej investimeve strategjike të vendit, siç është Aeroporti Ndërkombëtar i Vlorës, ku tashmë ka plasur lufta mes aksionerëve dhe krerëve të shtetit shqiptar për aksionet që lanë turqit, të cilët po ashtu morën plaçkën e tyre dhe u rikthyen nga kishin ardhur.
Behgjet Pacolli, i cili pretendon 98% të aksioneve në këtë aeroport, përmes “deal-eve” gojore me Valon Ademin, dha një intervistë të çuditshme disa ditë më parë në media, ku, ndërkohë që përpiqej të bënte PR-në e vetes, e nxirrte veten edhe më të zhveshur në skandalin e aeroportit të Vlorës, duke pretenduar ndër të tjera se nuk kishte parë çfarë kishte firmosur, teksa i kishin vënë para një dokument, i cili më pas u përdor për të kaluar 46% të aksioneve në pronësi të Ademit.
Po ashtu, “baca” harroi se po fliste para kamerave, ku pranoi se për aeroportin e Vlorës nuk kishte patur garë dhe se gjithçka ishte vendosur në zyrën e Belinda Ballukut, bisedë në të cilën ajo, sipas tij, e kishte edhe ofenduar.
Aeroporti i Vlorës, Behgjet Pacolli i paditur apo djallëzor?
Nëse e ka parë këtë intervistë, një prokuror i SPAK ka detyrimin minimal ta thërrasë Behgjet Pacollin për deklarime të mëtejshme, pasi duket se paska qenë dëshmitar edhe i një shkeljeje ligjore, të ngjashme me atë për të cilën akuzohet Belinda Balluku për tunelin e Llogarasë.
Ndërkohë që Behgjet Pacolli, Valon Ademi dhe Belinda Balluku kacafyten për “plaçkën” në aeroportin e Vlorës, strategjia e qeverisë për turizmin në vend ka marrë një goditje të fortë, pasi markat e njohura ndërkombëtare të hotelerisë kanë kuptuar se këtu nuk mund të bësh dot biznes nëse nuk vjen me mendësinë e plaçkitësit.
Disa muaj më parë, në kompleksin e njohur “Green Coast”, u hap një hotel nën menaxhimin e brandit ndërkombëtar “Accor”.
Këta të fundit nuk mund të investojnë kudo, pa marrë garancitë për plotësimin e standardeve të tyre, siç janë afërsia me aeroportin, infrastruktura etj.
Hoteli në fjalë, i planifikuar të ishte hapur 12 muaj në vit, tani është mbyllur. Menaxherët e huaj kanë mbledhur valixhet dhe janë larguar, deri në pritje të rihapjes së sezonit, pasi shqiptarët nuk bëjnë turizëm në tetor apo nëntor. Ndryshe do të ishte në një treg më të madh, që do të ofrohej nga një aeroport funksional në Vlorë.
Behgjet Pacolli deklaroi se punimet në këtë aeroport do të mbylleshin në mars, por ai nuk mund të ishte operacional, pikërisht për shkak të problemeve të tanishme mes aksionerëve dhe shtetit shqiptar.
Praktikisht, mosfunksionimi i Aeroportit të Vlorës po saboton strategjinë e turizmit në Shqipëri, ku herë Behgjet Pacolli, herë Valon Ademi dhe herë Belinda Balluku, bashkë me turqit, po kujdesen që gjërat të mos shkojnë sipas parashikimeve fillestare.
Thonë që plaçkitësit grinden kur ndajnë plaçkën dhe jo kur plaçkisin, dhe duket se ky është rasti tipik i disa plaçkitësve që i janë vënë në fyt turizmit shqiptar. /skyweb.al
