Përplasja mes Behgjet Pacollit dhe Valon Ademit është kthyer në një cirk akuzash, ku të dy palët akuzojnë njëri-tjetrin për mashtrim, manipulim dhe fshehje kontratash që lidhen me aksionet e projektit strategjik të Aeroportit të Vlorës.
Në emisionin “Opinion”, Valon Ademi e quajti Pacollin “mashtrues ordiner dhe manipulator”, ndërsa tregoi një episod në Lugano, ku sipas tij Pacolli shpërtheu në lot brenda në makinë.
“Sapo u futëm në makinë, ai nisi të qante dhe më tha: ‘Të gjithë po ma bëjnë me të padrejtë’,” deklaroi Ademi.
Deklaratat e Ademit vijnë vetëm disa ditë pasi vetë Pacolli kishte bërë akuzat e tij të forta, duke pretenduar se ishte ai që ishte mashtruar dhe manipuluar.
Çfarë tha më herët Behgjet Pacolli
Pacolli kishte sqaruar se në korrik 2023, një bashkëpunëtor i afërt i Ademit i kishte paraqitur dokumente për t’i firmosur, duke ia shitur si formalitete të thjeshta bankare.
Ai tha se firmosi pa e lexuar dokumentin, ndërsa më vonë mësoi se dokumenti në fjalë parashikonte transferimin e aksioneve të aeroportit në prill 2025.
Sipas tij, marrëveshja me Ademin kishte qenë vetëm gojore: secili do të zotëronte aq aksione sa investonte realisht.
Pacolli pretendon se Ademi e ka shtrembëruar këtë marrëveshje, ka paraqitur shifra të pasakta dhe ka vepruar në mënyrë të njëanshme për të marrë kontrollin e kompanisë.
Ai tha se nuk ishte informuar për kostot e ndërtimit, për lëvizjet financiare dhe për vendimmarrjet që ishin marrë pa dijeninë e tij.
E gjithë kjo histori vjen erë kanalizimesh.
Skandali mes Pacollit dhe Valon Ademit sapo ka hapur pusëtën, duke hedhur në erë strategjinë e turizmit të qeverisë shqiptare, në një moment kur Aeroporti i Vlorës duhej të ishte karta më e fortë e sezonit 2025. /skyweb.al
