Një tjetër tender i Agjencisë Kombëtare të Shoqërisë së Informacionit (AKSHI) ka ngritur pikëpyetje mbi mënyrën se si zhvillohen prokurimet, nisur edhe nga praktikat problematike që ndjek ky institucion.
Në qendër të këtij rasti qëndron kontrata me objekt “Mirëmbajtja e sistemit elektronik e-Inspektimi për Inspektoratin Qendror”, fituar me një vlerë prej 73.2 milionë lekësh pa TVSH, ose rreth 800 mijë euro.
Fondi limit i tenderit ishte 76.3 milionë lekë, çka do të thotë se fituesi është shpallur me 96% të vlerës fillestare, pa asnjë garë reale.
Fitues u shpall bashkimi i kompanive “Infosoft Systems” sh.p.k. dhe “Infosoft Business Solution” sh.p.k., të cilat kanë administratorë dhe pronarë të njëjtë, mes tyre Grigor Joti dhe Bledar Dhima.
Në dokumentet zyrtare të AKSHI-t rezulton se në tender kanë marrë pjesë edhe IkubINFO sh.p.k. dhe NAOL sh.p.k., por të dyja nuk kanë dorëzuar asnjë ofertë ekonomike apo dokumentacion teknik, duke u skualifikuar automatikisht.
Kjo praktikë, e përsëritur në disa tenderë të tjerë, ngre dyshime se disa kompani përdoren thjesht për të krijuar fasadën e konkurrencës, ndërkohë që fituesi është i përcaktuar paraprakisht.
Në fakt, NAOL sh.p.k. është përfshirë në disa tenderë të AKSHI-t pa dorëzuar ofertë, duke ngritur dyshime se shërben si pjesë e një skeme të qëllimshme për të krijuar garë fiktive dhe për të legjitimuar procedura që përfundojnë gjithmonë në duart e të njëjtëve operatorë.
Ky është jo rasti i parë ku AKSHI i jep kontrata të majme kompanive të lidhura me njëri-tjetrin përmes strukturave të përbashkëta pronësie.
Duke qenë se SPAK ka hapur hetime për tenderët e AKSHI-t, rasti pritet të shërbejë si një tjetër provë për të verifikuar rolin e NAOL sh.p.k. dhe skemat e mundshme të manipulimit të fondeve publike përmes konkurrencës fiktive. /skyweb.al
