Bashkimi Europian ka hapur një hetim ndaj kompanisë Google, duke e akuzuar se po shkel rregullat e konkurrencës përmes mënyrës se si menaxhon dhe filtron përmbajtjen në rezultatet e kërkimit. Hetimi është nisur pas ankesave nga botues dhe media evropiane, të cilat pretendojnë se politika e re e Google po dëmton të ardhurat e tyre dhe po ul dukshmërinë e faqeve të tyre në internet.
Hetimi lidhet me një rregull të ri të Google që ndalon faqet të publikojnë materiale nga palë të tjera vetëm për të rritur vizitat apo për të dalë më lart në kërkime. Sipas Komisionit Evropian, megjithatë, kjo politikë mund të ketë prekur padrejtësisht edhe faqe të ligjshme lajmesh apo portale që bashkëpunojnë me kompani të tjera.
Komisionerja e BE-së për konkurrencën, Teresa Ribera, tha se qëllimi i hetimit është të sigurohet që Google i trajton në mënyrë të barabartë të gjithë botuesit dhe faqet e internetit. Hetimi po bëhet në kuadër të Ligjit Evropian për Tregjet Dixhitale, i cili synon të kufizojë pushtetin e kompanive shumë të mëdha në internet.
Nga ana e saj, Google ka kundërshtuar akuzat, duke thënë se rregullat e saj për përmbajtjen janë krijuar për të mbrojtur përdoruesit nga faqet me cilësi të ulët dhe lajme mashtruese. Kompania paralajmëroi se ndërhyrja e BE-së mund ta bëjë më të vështirë ruajtjen e cilësisë së rezultateve të kërkimit.
Nëse hetimi vërteton se Google ka shkelur ligjin, kompania mund të përballet me një gjobë që mund të arrijë deri në 10 për qind të të ardhurave të saj vjetore në mbarë botën. Procesi pritet të zgjasë rreth një vit.
Ky hetim është një tjetër shembull i përplasjes mes Bashkimit Evropian dhe kompanive të mëdha të teknologjisë, ndërsa Brukseli kërkon të mbrojë konkurrencën e ndershme dhe të sigurojë një treg më të hapur për median dhe bizneset e vogla online. /Skyweb.al
