“Unë jam pronare e ‘Pharma Plus’, por nuk di asgjë mbi mënyrën se si operon kompania në pronësi time. Unë nuk e di gjendjen e medikamenteve në magazinë, nuk e di se sa është qiraja që paguaj për zyrën dhe nuk e di se kush e ka bërë kontratën me Fondin e Kujdesit Shëndetësor për rimbursimin e vlerës financiare për shitjen e produkteve”.
Alba Zylfo, pronare në letra e kompanisë farmaceutike, thotë para grupit hetimor të Prokurorisë së Tiranës se gjithçka që lidhet me aktivitetin tregtar kontrollohet nga një tjetër subjekt tregtar, “CFO Pharma”, në pronësi të biznesmenit Nadir Çausholli, sipas dokumentave hetimorë të siguruar nga “Boldnews.al”.
Grupi i skemës
Zonja Zylfo aktualisht nën masën e sigurimit “detyrim për paraqitje”, ndërsa bashkëshorti i saj, Frigul Milla, administrator i “CFO Pharma”, është shpallur në kërkim, pasi gjykata e Tiranës ka miratuar masën “arrest me burg”.
Bashkëshortët Milla-Zylfo janë pjesë e një grupi prej të paktën 8 personash, që dyshohet se kanë krijuar një skemë mashtruese, nga e cila është përfituar në mënyrë të paligjshme rimbursimi në vlerën e mbi 700 mijë eurove.
Persona të dyshuar nga Prokuroria e Tiranës janë edhe dy vartëse të tjera të Çaushollit tek “CFO Pharma”, Jona Berberi dhe Lorela Ballabani, kjo e fundit pronare në letra e kompanisë “Nedix Albania”. Ndaj tyre, gjykata ka caktuar masën “detyrim për paraqitje”.
Gjithashtu, është caktuar masa e sigurimit “arrest me burg” për ish-drejtorin e Fondit të Kujdesit Shëndetësor, Spartak Zekja, ndërkohë që është aplikuar masa “detyrim për paraqitje” dhe “pezullim nga detyra edhe për tre zyrtare të institucionit publik, Zade Mali, Esjana Gjishti dhe Romina Agalliu.
Hetimi po zhvillohet për disa vepra penale, përfshirë “falsifikimin e dokumentave” dhe “fshehjen e të ardhurave”. Ndërkohë, deri më tani, hetimet e Prokurorisë së Tiranës nuk duket se kanë mbërritur tek pronari i “CFO Pharma”, Nadir Çausholli i cili duket se është përfituesi kryesor i kësaj skeme të dyshuar mashtrimi.
Hetimi për 700 mijë euro
Në një përmbledhje të shpejtë, Prokuroria e Tiranës ka zbuluar se kompanitë “Pharma Plus” dhe “Nedix Albania”, të drejtuara nga dy vartëset e Çaushollit, kanë realizuar shitje fiktive për llogari të “CFO Pharma-s” të dy produkteve farmaceutike “Foster” dhe “Trimboë”.
Për këto “shitje”, ato janë rimbursuar në shumën e rreth 700 milionë lekëve të vjetra nga Fondi i Sigurimit të Detyrueshëm të Kujdesit Shëndetësor (FSKDSH).
Dy kompania “shitëse” nuk i kanë pasur asnjëherë këto produkte, pasi ekskluzivitetin për shitjen e tyre në Shqipëri e kishte një shoqëri tjetër, “Medicamenta”. Kjo e fundit, pasi ka konstatuar se subjektet “Pharma Plus”, “Nedix Albania” dhe “CFO Pharma” kanë kryer fatura shit-blerje për produktet ekskluzive të saj, kanë denoncuar rastin në Prokurori.
Alba Zylfo: Nuk di çfarë ndodh
Alba Zylfo ka punuar prej disa vitesh pranë shoqërisë “CFO Pharma”. Në tetor të vitit 2024 ajo thotë se ka blerë për 100 mijë lekë aksionet e shoqërisë “Pharma Plus”, e cila ishte prej vitesh në treg dhe gjendja në magazinë ishte e bollshme.
“Nuk kam bërë asnjë akt verifikimi dhe nuk e kam ditur se sa ka qenë gjendja e medikamenteve kur e kam blerë kompaninë”, ka deklaruar ajo para grupit hetimor.
Zylfo thotë gjithashtu se nuk e di se si është krijuar gjendja e medikamenteve pranë “Pharma Plus”, si dhe kush i ka blerë ato. Kompania e saj ka selinë në të njëjtët ambjente me “CFO Pharma-n” e Çaushollit. Por, ajo është shprehur se nuk e di se sa është vlera mujore e qirasë që paguan, pasi nuk e ka lidhur ajo kontratën me “CFO Pharma”.
Në vijim, Alba Zylfo thotë se “nuk kam dijeni se kush i ka dorëzuar dokumentet për lidhjen e kontratës me FSDKSH, pasi kjo kontratë është lidhur në datë 04.10.2024” (data e blerjes së kompanisë nga ana e saj).
Ajo nuk mban mend se cilat janë barnat për të cilat është lidhur kontrata me FSDKSH dhe se veprimet financiare janë kryer nga një operatore e shoqërisë “CFO Pharma”, e quajtur I.S.
Lorela Ballabani: “Nedix” u krijua nga CFO Pharma
Lorela Ballabani punon prej vitit 2017 pranë “CFO Pharma” të Nadir Çaushollit dhe aktualisht mban pozicionin e menaxheres në këtë shoqëri. Ndërkohë, prej janarit të vitit 2025, ajo rezulton formalisht edhe si pronare e shoqërisë farmacuetike “Nedix Albania”, një prej kompanive të përfshira në skemën mashtruese 700 mijë euro.
Para grupit hetimor, Ballabani është shprehur se “besoj që subjekti ‘Nedix Albania’ është krijuar nga zyrat juridike dhe/ose financiare të “CFO Pharma”. Ajo thotë se nuk i njeh medikamentet që tregton subjekti që ajo administron.
Megjithëse administratore e subjektit “Nedix Albania”, Lorela Ballabani ka shpjeguar se “nuk e di sa ka qenë vlera e qirasë që paguante për ambientin e marrë me qira. Ajo thotë gjithashtu se nuk e di se cili është marrë me përpilimin e kontratës që subjekti i saj ka nënshkruar me Fondin e Kujdesit Shëndetësor.
Në vijim, Ballabani ka deklaruar se “nuk e di cila është lista e barnave, për të cilat kam lidhur kontratën me FSDKSH, si dhe nuk kam informacion se kush merret me shitjen dhe blerjen e tyre. Unë kam mbuluar vetëm pjesën formale, si administratore dhe drejtuese teknike, por detyra ime reale funksionale ka qenë promocioni aktiv pranë “CFO Pharma”.
Më tej, ajo ka shtuar se listën e inventarit për barnat për të cilat do të lidhej kontrata e ka marrë të gatshme nga operatoret e subjektit “CFO Pharma”.
“Nuk kam dijeni se kush i ka blerë këto medikamente, si dhe nuk ka dijeni për burimin e të ardhurave që kanë shërbyer për blerjen e tyre”, ka deklaruar më tej Ballabani, duke forcuar gjithnjë e më shumë bindjen e Prokurorisë se në qendër të skemës së dyshuar mashtruese është “CFO Pharma” e Nadir Çaushollit. /Boldnews.al
