Hetimet për ish-zv.kryeministrin Arben Ahmetaj marrin një kthesë të re. Gjatë seancës gjyqësore për çështjen “Buka”, Prokuroria e Posaçme deklaroi se ka identifikuar një transfertë prej 3 milionë eurosh të kryer nga Shqipëria drejt Austrisë, një shumë që po hetohet paralelisht si pjesë e pasurisë së dyshuar të Ahmetajt.
Prokurori i posaçëm Elvin Gokaj konfirmoi në sallë se pista financiare është ende nën verifikim dhe nuk është përfshirë në dosjen që po shkon në gjykim.
“Kemi rënë në kontakt me një shumë të madhe parash që është transferuar nga Shqipëria në një vend të BE-së dhe po verifikohet,” – u shpreh Gokaj, duke lënë të kuptohet se hetimi nuk është mbyllur.
Avokati mbrojtës, Henrik Ligori, reagoi menjëherë duke akuzuar SPAK-un se po premton akuza të tjera pa i bërë publike provat. “Nëse ka hetime të tjera, prokurori nuk kishte pse nxitonte të mbyllte këtë dosje. Nuk mund të ketë proces të rregullt me akte surprizë,” – deklaroi ai.
SPAK argumentoi se çështja “Buka” është ndarë nga hetimi për transfertën 3-milionëshe për shkak të afateve të parashkrimit.
Ndërkohë, në dosjen kryesore Prokuroria pretendon se Ahmetaj ka shkaktuar 7 miliardë lekë dëm ekonomik përmes privatizimit të ndërmarrjes “Buka”, duke firmosur vendime në kundërshtim të hapur me vendimet gjyqësore që e ndalonin atë.
Në seancë u bë e ditur se Ministria e Drejtësisë i ka dërguar zyrtarisht Zvicrës kërkesën për ekstradimin e Ahmetajt, ndërsa Interpol ka konfirmuar praninë e tij atje, pa dhënë detaje mbi gjendjen e procedurave.
SPAK ka kërkuar gjithashtu të thirren 14 dëshmitarë, mes tyre edhe ish-ministri i Financave Shkëlqim Cani.
Hetimet për transfertën e dyshuar prej 3 milionë eurosh vijojnë në mënyrë të pavarur, ndërsa procesi gjyqësor për dosjen “Buka” pritet të nisë në GJKKO. /skyweb.al
