Gjykata e Posaçme AntiKorrupsion vendosi sot pezullimin nga detyra të zëvendëskryeministres dhe ministres së Infrastrukturës dhe Energjisë, Belinda Balluku, duke i caktuar njëkohësisht edhe masën e ndalimit të daljes jashtë vendit.
Vendimi lidhet me hetimin që SPAK po zhvillon për ndërtimin e tunelit të Llogarasë, çështje për të cilën më 31 tetor Balluku u mor e pandehur për akuzën “shkelje të barazisë në tendera”.
Në reagimin e saj të atëhershëm, Balluku deklaroi se kishte pranuar paraqitjen në SPAK “në respekt të plotë të organeve të drejtësisë”, duke e konsideruar procesin si një provë që duhet të bazohet te transparenca dhe llogaridhënia. Ajo ka ripërsëritur publikisht se nuk do të sulmojë, akuzojë apo kërcënojë organet e drejtësisë, edhe kur preket personalisht, duke nënvizuar se reforma në drejtësi është një proces që ajo e mbështet.
Për të njëjtën çështje, ku janë nën hetim pesë persona, dy zyrtarë të tjerë janë lënë në “arrest shtëpie”. Ligji parashikon që seanca e komunikimit të masave të sigurisë duhet të zhvillohet brenda pesë ditëve nga shpallja e vendimit.
Ndërkohë, GJKKO njoftoi se masat e sigurisë kanë karakter sekret dhe se çdo sqarim zyrtar do të jepet vetëm në momentin e duhur procedurial. Pritet që SPAK të dalë me një komunikim publik mbi vendimin dhe ecurinë e hetimeve.
Belinda Balluku drejton Ministrinë e Infrastrukturës dhe Energjisë që nga janari i vitit 2019, ndërsa në vitin 2022 u emërua zëvendëskryeministre e vendit. /skyweb.al
