Prurjet e mëdha të lumit Devoll gjatë orëve të fundit kanë çuar në rritjen e ndjeshme të nivelit të ujit në basenin e HEC-it të Moglicës, duke e afruar atë në kufijtë maksimalë teknikë. Për këtë arsye, strukturat përgjegjëse kanë zbatuar protokollet e sigurisë dhe kanë hapur një nga portat e shkarkimit, me qëllim garantimin e funksionimit normal të hidrocentralit.
Autoritetet bëjnë të ditur se shkarkimi po kryhet në mënyrë të kontrolluar dhe sipas të gjitha standardeve të sigurisë, pa krijuar rrezik për zonat poshtë digës.
Ndërkohë, terreni përreth është nën monitorim të vazhdueshëm nga grupet e gatishmërisë. Qytetarëve u është bërë thirrje të shmangin shtratin e lumit Devoll dhe zonat pranë tij, për shkak të mundësisë së rritjes së mëtejshme të nivelit të ujit. /Skyweb.al
