Çmimi i vezëve në Kosovë ka arritur nivelin më të lartë të regjistruar ndonjëherë, duke kaluar mbi 6.39 euro për një komplet prej 30 vezësh. Të dhënat zyrtare tregojnë se një çmim i tillë nuk është parë në asnjë periudhë të pasluftës. Edhe pse në dhjetor të vitit 2022 dhe janar të 2023 u shënua një shtrenjtim i madh, çmimi i kompletit nuk e kishte kaluar kufirin prej 5 eurosh.
Ditëve të fundit, në shumë markete dhe supermarkete të vendit, konsumatorët po përballen me çmime që tejkalojnë 6 euro për komplet. Ndërkohë, në dyqanet e “Konsoni”-t, prodhuesit dhe tregtarit më të njohur të produkteve të shpendëve, çmimi i vezëve ka kërkuar papritur nga 4.50 euro në 5 euro – një rritje mbi 10 për qind.
Pavarësisht kësaj rritjeje të pazakontë, nuk ka ende një shpjegim zyrtar as nga institucionet, as nga vetë prodhuesit. Shitësit thonë se çmimet nuk varen prej tyre, pasi ata vetëm shesin produktin. Ekspertët e sektorit theksojnë se Kosova ka kapacitete të mjaftueshme të pularive për të mbuluar nevojat vendore dhe se nuk ka pasur rritje të kostove të prodhimit, si të misrit apo ushqimit për shpendë.
Vrojtues të tregut sugjerojnë se një ndër arsyet kryesore të shtrenjtimit mund të jetë eksporti i madh i vezëve drejt Shqipërisë, ku kërkesa dhe çmimet janë më të larta. Ky orientim i prodhuesve drejt tregut më fitimprurës mendohet se po ndikon drejtpërdrejt në furnizimin dhe çmimin e produktit në Kosovë.
Në përgjithësi, rritja e çmimeve ka vazhduar edhe këtë vit, veçanërisht te produktet ushqimore, të cilat sipas të dhënave deri në nëntor, përbëjnë pjesën kryesore të shpenzimeve të familjeve kosovare.
