Turizmi në Shqipëri po njeh një nga periudhat më dinamike të viteve të fundit. Gjatë Janarit–Tetorit 2025, vendi ka regjistruar 11.1 milionë hyrje të shtetasve të huaj, me një rritje 6.7% krahasuar me të njëjtën periudhë të vitit 2024. Por ajo që bie më shumë në sy është rritja e pazakontë e vizitorëve izraelitë, e cila përkon me tensionet e ashpra mes Izraelit, Turqisë dhe disa vendeve arabe.
Sipas të dhënave zyrtare, hyrjet nga Izraeli janë rritur me 598.1%, duke kaluar nga 9,741 vizitorë në 68,002 turistë gjatë kësaj periudhe. Shqipëria, e perceptuar si destinacion i sigurt, neutral dhe i lirë për t’u vizituar, është shndërruar në një alternativë të favorshme për qytetarët izraelitë që kanë kufizuar udhëtimet drejt vendeve tradicionale të rajonit.
Rritje të forta raportohen edhe nga disa vende të tjera. Egjipti shënon 70.3%, India 62.2%, ndërsa Danimarka 65.1%, duke treguar diversifikimin e tregjeve turistike dhe zgjerimin e interesit ndaj Shqipërisë.
Edhe vendet europiane vijojnë trendin pozitiv: Franca rritet me 36.9%, Gjermania me 22.1%, Estonia me 22.4%, dhe Holanda me 11%. Të dhënat tregojnë se Shqipëria po konsolidohet si destinacion gjithëvjetor, dhe jo vetëm gjatë sezonit veror.
Nga ana tjetër, disa vende kanë sjellë më pak vizitorë. Bjellorusia regjistron rënie 15.6%, Polonia 8.9%, Spanja 4%, Letonia 24.4%, ndërsa Malajzia ka një ulje prej 11.6%. Luhatjet lidhen me faktorë ekonomikë, politika vizash dhe zhvillime të brendshme në tregjet respektive.
Turizmi rajonal mbetet i qëndrueshëm. Kosova kryeson me 4.2 milionë hyrje dhe rritje 5.1%, ndërsa Maqedonia e Veriut dhe Mali i Zi rriten përkatësisht me 7.3% dhe 3.1%.
Shifrat e siguruara nga Policia e Shtetit dhe INSTAT tregojnë se Shqipëria po arrin të tërheqë vizitorë nga të gjitha kontinentet, duke vendosur një rekord historik hyrjesh. Me trendin aktual dhe me zhvendosjen e flukseve turistike për shkak të tensioneve në Lindjen e Mesme, vendi pritet të mbyllë vitin me një nga bilancet më të forta turistike të dekadës. /skyweb.al
