Ulja në 2.5% e normës bazë të interesit nga Banka e Shqipërisë në muajin korrik është përkthyer menjëherë në reduktim të normave të interesit për kreditë në lekë në sistemin bankar.
Sipas Raportit Tremujor të Politikës Monetare, kjo lëvizje ka filluar të ndihet kryesisht tek kreditë e bizneseve, ndërsa ndikimi më i gjerë në ekonomi pritet të shfaqet në muajt pasues.
Norma mesatare e interesit për kreditë e reja në lekë për bizneset rezultoi në 6.7% në tremujorin e dytë, nga 6.4% që ishte në tremujorin e parë.
Pavarësisht kësaj, bankat kanë ndjekur një sjellje të ndryshme sipas madhësisë së huasë: kreditë deri në 35 milionë lekë janë liruar, ndërsa kreditë e mëdha mbi 140 milionë lekë kanë shënuar rritje të kostos.
Për individët, normat e interesit për kreditë në lekë për blerje apo ndërtim banese nuk kanë pësuar ndryshime, duke mbetur në nivelin 3.8%. Ky nivel konsiderohet më i ulëti i regjistruar që prej nisjes së ciklit lehtësues të politikës monetare një vit më parë.
Më luhatëse kanë qenë kreditë konsumatore në lekë – norma e interesit për këto hua është rritur në 8.9% në tremujorin e dytë, nga 8.2% në tremujorin e parë.
Sa u përket kredive në euro, politikat e bankave kanë qenë më të qëndrueshme. Për bizneset, normat e interesit mbeten thuajse të pandryshuara, ndërsa kreditë hipotekare të individëve në euro kanë shënuar një rritje të lehtë në 5.1%. Edhe në këtë rast, vërehen ndryshime sipas madhësisë – kostot kanë rënë për kreditë e vogla deri në 250 mijë euro, por janë rritur për kreditë e mëdha mbi 1 milion euro.
Ekspertët vlerësojnë se me rikthimin e normës bazë në nivele lehtësuese, pritet që gjatë gjysmës së dytë të vitit efekti në uljen e kostos së huamarrjes të ndihet më ndjeshëm, si tek bizneset ashtu edhe tek individët./skyweb.al
