Agjencia Kombëtare e Punësimit dhe Aftësive njofton se aktualisht janë 6000 vende të lira pune të shpallura në portalin zyrtar puna.gov.al, duke ofruar një gamë të gjerë pozicionesh në sektorë të ndryshëm të ekonomisë.
Qindra vende pune janë të hapura në profile profesionale si ekonomist, menaxher, specialist komunikimi, inxhinier mekanik, zhvillues softuerësh, nëpunës zyre, inxhinier civil, drejtues në tregti, inxhinier elektroteknologjie, ndërsa një sërë profesionësh të tjera mbulojnë shërbimet dhe industrinë: punonjës pastrimi, punëtor ndërtimi, ndihmës kuzhinier, rrobaqepës, sistemues malli, prodhues këpucësh, kamarierë, shitës, kuzhinierë dhe banakaierë.
Sipas Agjencisë, këto pozicione janë të hapura për të gjitha nivelet arsimore, nga aplikantët pa eksperiencë deri te profesionistët e specializuar, duke krijuar mundësi konkrete punësimi për çdo profil.
Aplikimi kryhet lehtësisht online në puna.gov.al, ku qytetarët mund të regjistrohen dhe të përzgjedhin pozicionet që u përshtaten. Për ata që kanë nevojë për orientim, zyrat e punës ofrojnë asistencë të drejtpërdrejtë, ndërsa komunikimi është i hapur edhe përmes email-it dhe WhatsApp.
Agjencia nënvizon se synimi kryesor mbetet lehtësimi i punësimit në vend dhe ndihma për qytetarët në ndërtimin e një të ardhmeje më të sigurt profesionale. /skyweb.al
