Ilir Meta, i ndodhur në paraburgim, ka kërkuar zyrtarisht që të merret në pyetje nga SPAK për ngjarjet e 21 janarit 2011.
Përmes avokatit të tij, Meta deklaron se ka dijeni të rëndësishme që mund të ndihmojnë në zbardhjen e plotë të asaj që ndodhi dhe se është i gatshëm të dëshmojë. Kjo lëvizje ka sjellë reagimin e kryedemokratit Sali Berisha, i cili thotë se Meta, si zëvendëskryeministër në atë kohë, padyshim që mund të ketë informacione të vlefshme.
Berisha ka zbuluar për herë të parë një episod të panjohur deri më sot: një bisedë me ish-ministrin e ndjerë Dritan Prifti, disa ditë para 21 janarit. Sipas tij, Prifti e ka shantazhuar në zyrë duke i kërkuar një post më të rëndësishëm, përndryshe do të publikonte videon që më vonë u transmetua në “Fiks Fare”.
“Dritan Prifti më kërkoi të më emëronte në një detyrë tjetër ose ndryshe, më tha, kam një regjistrim. Fjalët e mia kanë qenë të qarta: nxirre sapo të dalësh nga dera e zyrës. Nxirre. Kurrë nuk më merr dot kush peng”, deklaron Berisha, duke theksuar se ai e ka kundërshtuar kategorikisht çdo lloj presioni.
Berisha shton se Meta i kishte shkuar në zyrë rreth datës 14 ose 15 janar, duke i thënë se do të jepte dorëheqjen sepse nuk pranonte të paraqitej në Prokurori si zëvendëskryeministër. Berisha e cilëson këtë si një arsye më shumë pse Meta mund të dijë detaje mbi tensionet politike të ditëve para protestës që përfundoi tragjikisht.
Ngjarjet e 21 janarit patën si motiv publikimin e videos së regjistruar nga vetë Dritan Prifti, ku ll Metës i atribuohen favore për një tender hidrocentrali dhe shifra prej 700 mijë eurosh. Një video që Meta vazhdon ta quajë të montuar edhe sot, 14 vite më vonë.
Meta pretendon se shuma prej 700 mijë eurosh ka të bëjë me fondet që investitorët kishin shpenzuar për projektet e hidrocentraleve, dhe jo me korrupsion. Ai thekson se hetimi duhet të zgjerohet përtej vrasjeve, për të përfshirë edhe mosparandalimin e dhunës dhe ndikimet që sipas tij vinin nga faktorë të huaj.
Protesta e 21 janarit 2011 u thirr nga Partia Socialiste dhe përfundoi me vrasjen e Ziver Veizit, Faik Myrtajt, Hekuran Dedës dhe Aleks Nikës para Kryeministrisë. Pas një procesi të gjatë gjyqësor, Garda e Republikës u shpall përgjegjëse për vrasjet nga pakujdesia, ndërsa Ndrea Prendi u dënua me 1 vit burg dhe Agim Llupo me 3 vite.
Dosja e 21 janarit vijon e hapur, ndërsa familjarët e viktimave kërkojnë drejtësi prej 13 vitesh. SPAK ka tashmë në dorë hetimin e çështjes, i cili po kryhet nga prokurori Alfred Shehu, ndërsa personat e akuzuar nga familja e Aleks Nikës përfshijnë edhe dy nga figurat më të larta të asaj kohe: ish-kryeministrin Sali Berisha dhe ish-ministrin e brendshëm Lulzim Basha.
Kërkesa e Metës për t’u pyetur dhe deklaratat e Berishës rikthejnë në qendër një nga ngjarjet më të rëndësishme politike dhe gjyqësore të 30 viteve të fundit, duke hapur një kapitull të ri në debatin mbi të vërtetat e 21 janarit.
