Energjia e prodhuar nga centralet fotovoltaike u rrit ndjeshëm gjatë 4-mujorit të parë të këtij viti, duke arritur nivelin më të lartë të regjistruar deri më tani për këtë periudhë.
Sipas të dhënave të Entit Rregullator të Energjisë, impiantet fotovoltaike prodhuan në total 294,294 mWh energji gjatë periudhës janar–prill, ose 6.68% të prodhimit vendas, i cili në total arriti në 4,404,981 mWh.
Krahasuar me të njëjtën periudhë të një viti më parë, prodhimi nga centralet diellore është rritur me rreth 51%, duke qenë se në të njëjtën periudhë të vitit që shkoi u gjenerua 194,458 mWh energji.
Megjithatë, pesha e energjisë diellore në prodhimin kombëtar mbetet pothuajse në të njëjtat nivele si një vit më parë. Kjo lidhet me faktin se gjatë kësaj periudhe është rritur edhe prodhimi i përgjithshëm vendas i energjisë elektrike, i mbështetur kryesisht nga prodhimi i kaskadës së Drinit, si edhe nga hidrocentralet private dhe koncesionare.
Ndërkaq, kontributi i energjisë diellore në sistemin elektroenergjetik pritet të vijojë të zgjerohet, pasi një sërë projektesh të reja kanë avancuar me procedurat për marrjen e lejeve dhe ndërtimin e impianteve.
Interesi i investitorëve privatë për sektorin fotovoltaik mbetet i lartë, ndërsa pranë institucioneve përgjegjëse vijojnë të depozitohen aplikime për projekte të reja, duke konfirmuar se energjia diellore mbetet një nga segmentet me ritmin më të shpejtë të zhvillimit në tregun vendas të energjisë. /tvscan.al
