Konsumimi i moderuar i verës mund të ofrojë disa përfitime të vogla për shëndetin e zemrës, por sipas specialistëve këto efekte mund të arrihen edhe përmes ushqimeve si rrushi apo frutat e pyllit – pa rreziqet që sjell alkooli.
Oliver Guttmann, kardiolog në spitalin Wellington në Londër, thekson se njerëzit nuk duhet të mendojnë se vera është e shëndetshme në vetvete. Ai kujton se alkooli lidhet me tension të lartë të gjakut, probleme të mëlçisë, aparatit tretës, shëndetit mendor, dobësim të sistemit imunitar dhe rrit rrezikun për disa lloje kanceri.
Megjithatë, studimet tregojnë se konsumimi i moderuar i verës mund të ketë një efekt mbrojtës të kufizuar ndaj zemrës. Antioksidantët si resveratroli – i pranishëm në lëkurën e rrushit dhe në verën e kuqe – mund të ndihmojnë në uljen e kolesterolit të keq dhe në mbajtjen e enëve të gjakut të hapura dhe elastike, çka ul rrezikun për sëmundje kardiovaskulare, probleme me veshkat dhe infarkt.
Por ekspertët paralajmërojnë se nuk duhet neglizhuar dëmi i alkoolit. Në një deklaratë të vitit 2023, Organizata Botërore e Shëndetësisë theksoi se nuk ekziston nivel i sigurt i konsumimit të alkoolit, duke e cilësuar atë karcinogjen të grupit 1 – në të njëjtën kategori me asbestin dhe duhanin.
Përbërësit e dobishëm që gjenden në verë ofrohen po aq mirë edhe nga frutat e pyllit dhe rrushi, pa efektet anësore të alkoolit. Sipas Guttmann, nuk mund të pritet që të gjithë të heqin dorë nga konsumimi i verës, por moderimi mbetet vendimtar. Ai kujton se alkooli përmban shumë sheqer dhe kalori, si dhe dëmton mëlçinë.
Kardiologu rekomandon të mos tejkalohen 20 gota të vogla vere në muaj, ndërsa Fondacioni Britanik i Zemrës këshillon jo më shumë se 14 njësi alkooli në javë – rreth gjashtë gota të mesme vere.
Guttmann shton se vera nuk duhet parë si ilaç dhe nuk mund të kompensojë një mënyrë jetese të pashëndetshme. /Skyweb.al
