Ka nisur shpërndarja e bonusit të fundvitit për pensionistët, i cili këtë vit jepet sipas të njëjtave dy fasha si në vitin 2024. Ata që marrin pension deri në 20 mijë lekë të reja në muaj përfitojnë bonusin maksimal prej 15 mijë lekësh, ndërsa pensionistët me pension mujor mbi 20 mijë lekë marrin një shpërblim prej 10 mijë lekësh.
Në disa pika të postës janë raportuar mungesa të përkohshme të parave, për shkak të fluksit të lartë dhe mbylljes së bankave si ditë pushimi, por procesi vijon normalisht.
Kategoritë që përfitojnë bonusin prej 15 mijë lekësh janë pensionet e invaliditetit, pensionet familjare, pensionet sociale, trajtimet e veçanta financiare si për minatorët, industrinë ushtarake, veteranët, si edhe pensionet e parakohshme për vjetërsi shërbimi dhe profesionet e vështira deri në 20 mijë lekë.
Ndërkohë, bonusin prej 10 mijë lekësh e përfitojnë 221,780 persona të tjerë me pensione mbi nivelin 20 mijë lekë.
Duke nisur nga janari 2026, përveç indeksimit vjetor që zbatohet rregullisht, do të nisë edhe rritja mujore e pensioneve, sipas planit të ri të bërë publik nga qeveria.
Bonusi i fundvitit mund të tërhiqet gjatë gjithë muajit dhjetor dhe, për ata që nuk arrijnë ta marrin brenda këtij afati, tërheqja do të jetë e mundur deri më 30 qershor 2026.
Gjatë këtij viti u dha për herë të parë edhe një bonus pranvere, me 10 mijë lekë për pensionet deri në 20 mijë lekë dhe 5 mijë lekë për pensionet mbi këtë nivel.
Sipas parashikimeve zyrtare, deri në fund të vitit 2029, pensioni i plotë urban do të arrijë 40 mijë lekë, pensioni urban i pjesshëm do të jetë mesatarisht 22 mijë lekë, pensioni rural dhe familjar pritet të shkojë në 18 mijë lekë, ndërsa pensioni i invaliditetit do të rritet në 30 mijë lekë nga 20 mijë lekë që është aktualisht. /skyweb.al
