Presidenti amerikan Donald Trump ka përsëritur kritikat ndaj Evropës, duke e akuzuar kontinentin për politika të dobëta në migracion dhe energji.
Gjatë një fjalimi para mbështetësve në Pensilvani, Trump u shpreh se Evropa rrezikon “shkatërrim” nëse nuk ndryshon qasjen ndaj këtyre dy çështjeve. Ai theksoi se “politika e migracionit është aq e dobët sa po shkatërron Evropën tonë të bukur”, duke shtuar gjithashtu se ai vetë “e do Evropën”.
Trump u ndal edhe te politika energjetike e Britanisë së Madhe, duke thënë se ka këshilluar kryeministrin Keir Starmer që të rrisë prodhimin e naftës në Detin e Veriut. Sipas tij, shfrytëzimi i këtij burimi është thelbësor, përndryshe Starmer “rrezikon të mos qëndrojë gjatë në detyrë”.
Fjalimi i kreut të Shtëpisë së Bardhë, që ngjante me një tubim elektoral, nisi me kritika për çmimet e larta në SHBA, përpara se të kalonte te qëndrimet e ashpra ndaj partnerëve evropianë. Komente të ngjashme Trump i ka bërë edhe ditët e fundit, sidomos duke kritikuar politikat e Gjermanisë.
Këto deklarata vijnë vetëm një javë pasi administrata amerikane publikoi strategjinë e re të sigurisë kombëtare për mandatin e tij të dytë. Dokumenti akuzon Evropën për “erozion të demokracisë dhe lirisë së shprehjes”, rënie të normave të lindshmërisë, censurim të fjalës së lirë dhe humbje të identitetit kombëtar. Publikimi i strategjisë ka shkaktuar reagime të forta dhe zemërim në mbarë kontinentin. /Skyweb.al
