Dhoma Amerikane e Tregtisë zhvilloi sot një takim me përfaqësues të bizneseve, ku u diskutuan problematikat që ato ndeshin në përballjen e përditshme me administratën tatimore.
Takimi synoi krijimin e një platforme dialogu për të ndihmuar në përmirësimin e procedurave dhe praktikave fiskale në vend.
Alketa Uruçi, përfaqësuese e Dhomës Amerikane, theksoi nevojën për një hap të madh në hartimin e ligjeve më të mira dhe në përafrimin me legjislacionin e Bashkimit Europian. Ajo nënvizoi se mungesa e përditësimit të të dhënave në faqen zyrtare të tatimeve dhe praktikat e gabuara të administratës po krijojnë barrë serioze për bizneset.
“Në faqen e tatimeve nuk ka përditësim të dhënash. Anëtarët tanë kërkojnë një hap madhor, jo vetëm në bërjen e ligjeve të mira, por edhe në përafrimin e tyre me BE-në. Praktikat e administratës tatimore për TVSH-në janë shumë të gabuara,” u shpreh Uruçi.
Ajo solli dy shembuj konkretë që, sipas bizneseve, po dëmtojnë investimet dhe operimin normal të subjekteve. Së pari, rimbursimi i TVSH-së për investime në turizëm dhe industri, ku administrata tatimore “gjen artifica për të mos kredituar TVSH-në”, duke krijuar një barrë të rëndë financiare për investitorët.
Rasti i dytë lidhet me praktikat për shitjet nën kosto, ku tatimet po aplikojnë interpretim penalizues ndaj bizneseve.
Një tjetër shqetësim i ngritur lidhet me subjektet që operojnë në fushën e energjisë elektrike. Uruçi tha se për shkak të ndryshimeve në çmimin e energjisë, këto kompani janë penalizuar dhe detyruar të paguajnë tatime të larta, megjithëse nuk e kanë shitur energjinë me çmimin e blerjes.
“Kemi shumë ankesa për marrëveshjen tatimore,” përfundoi Uruçi, duke theksuar se bizneset kërkojnë qartësi, transparencë dhe praktika harmonizuar me standardet europiane. /skyweb.al
