Në Lugano, në jug të Zvicrës, përdorimi i Bitcoin po bëhet gjithnjë e më i zakonshëm. Në një McDonald’s pranë liqenit, një klient pyet nëse mund të paguajë me Bitcoin dhe shitësi i ofron një terminal të posaçëm për pagesa me kriptomonedhë, shkruan BBC.
Bashkia ka shpërndarë falas pajisje të tilla për qindra biznese, duke e bërë kriptovalutën një alternativë reale ndaj frangut zviceran.
Sot, rreth 350 dyqane, bare dhe restorante në Lugano pranojnë Bitcoin. Edhe shërbimet komunale, përfshirë pagesat për kujdesin parashkollor, mund të kryhen me këtë kriptomonedhë. Disa përdorues e shohin pagesën me Bitcoin si një mënyrë për të u liruar nga sistemi financiar tradicional, ndërsa të tjerë e konsiderojnë thjesht një alternativë më të lirë, pasi komisionet janë zakonisht më të ulëta se ato të kartave bankare.
Iniciativa “Plan B”, e nisur nga bashkia dhe kompania Tether në vitin 2022, ka si qëllim ta bëjë Luganon qendrën kryesore evropiane të Bitcoin. Drejtoresha e projektit, Mir Liponi, rrëfen se ka jetuar vetëm me Bitcoin për 11 ditë, duke treguar se shumica e nevojave bazë mund të mbulohen pa përdorur para tradicionale, edhe pse pagesat për transportin publik, karburantin dhe faturat e energjisë ende nuk mund të kryhen me kriptomonedhë.
Megjithatë, skepticizmi nuk mungon. Disa banorë lidhin kriptovalutat me spekulime dhe rreziqe financiare, ndërsa ekspertët paralajmërojnë se luhatjet e vlerës së Bitcoin mund të jenë të dëmshme për tregtarët, të cilëve u rekomandohet konvertimi i menjëhershëm në monedha tradicionale.
Pavarësisht debatit, kryebashkiaku Michele Foletti e sheh Bitcoin si një mundësi për inovacion dhe zhvillim ekonomik. Aktualisht, rreth 110 kompani të sektorit të kripto-teknologjisë kanë vendosur aktivitetin e tyre në Lugano, duke e kthyer qytetin në një pikë kyçe për industrinë e kriptomonedhave në Europë. /Skyweb.al
