Një studim i ri ka zbuluar se pasagjerët e avionëve mund të ekspozohen ndaj niveleve shumë të larta të grimcave ultrafine, grimca mikroskopike që nuk kapen shpesh nga sistemet e zakonshme të monitorimit të ndotjes së ajrit.
Studiues nga Université Paris Cité vendosën pajisje matëse në rreshtat e parë të kabinës ose në galeri gjatë fluturimeve nga Parisi drejt destinacioneve të ndryshme evropiane. Të dhënat treguan se përqendrimet më të larta të këtyre grimcave regjistroheshin gjatë hipjes në avion dhe gjatë lëvizjes së avionit në pistë, duke arritur nivele më shumë se dyfish më të larta se ato që OBSH i konsideron të rrezikshme. Në lartësi të madhe, ajri i kabinës rezultoi të ishte dukshëm më i pastër, por ndotja rritej sërish gjatë zbritjes dhe afrimit me pistën. E njëjta tendencë u vërejt edhe për grimcat e karbonit të zi, të cilat ishin veçanërisht të pranishme në ambientin e aeroportit.
Ekspertët e konsiderojnë këtë situatë shqetësuese, sidomos duke pasur parasysh se këtë vit pritet që numri i udhëtarëve ajrorë të tejkalojë për herë të parë shifrën 5 miliardë. Aeroportet dhe avionët mbeten ende burime të rëndësishme ndotjeje, me kontrolle më të kufizuara krahasuar me transportin rrugor dhe sektorët industrialë.
Hulumtime të tjera tregojnë se grimcat ultrafine nga aeroporti Charles de Gaulle përhapen edhe në zonat përreth, duke u thithur nga banorët deri në 5 kilometra larg aeroportit. Një situatë e ngjashme është vërejtur edhe në Londër, ku grimcat e lëshuara nga Heathrow mbulojnë zona të gjera në perëndim dhe qendër të qytetit, duke ekspozuar miliona njerëz.
Ekspertët theksojnë nevojën urgjente për më shumë kërkime mbi ndikimin e ndotjes së ajrit në shëndetin e punonjësve të aviacionit, udhëtarëve dhe komuniteteve që jetojnë pranë aeroporteve. /Skyweb.al
