Kryeministri Edi Rama zhvilloi sot një takim me fermerët e Elbasanit, ku theksoi se sektori i bujqësisë po hyn në një fazë të re mbështetjeje financiare dhe institucionale, me dyfishimin e buxhetit për zhvillimin rural dhe një sërë mekanizmash të rinj që synojnë rritjen e prodhimit dhe fuqizimin e eksporteve.
Gjatë fjalës së tij, kryeministri Rama u shpreh se mandati i ri qeverisës është një prej më të vështirëve, por se mbështetja e qytetarëve me 83 mandate i jep qeverisë hapësirën e nevojshme për të përmbyllur negociatat e anëtarësimit në BE dhe për t’i vendosur transformimeve të nisura “vulën europiane”.
Ai nënvizoi progresin e tre mandateve të fundit në bujqësi, ku prodhimi i serave është trefishuar, duke arritur në 220 hektarë, ndërsa prodhimi i perimeve i është afruar 1.5 milionë tonëve.
Rama theksoi se eksportet bujqësore janë zgjeruar dhe kanë përmbysur raportin import–eksport. Pjesa e importeve ka rënë në 1/3, ndërsa objektivi i qeverisë është 1 import, 2 eksporte.
Vetëm për nëntëmujorin e parë të vitit 2025, vlera e eksporteve bujqësore ka kaluar gjysmën e miliardit euro.
Kryeministri konfirmoi se buxheti i bujqësisë për vitin 2026 “nuk është thjesht më i lartë, por shumë më i lartë”, duke dyfishuar fondet e skemës kombëtare. Ai theksoi gjithashtu se të gjitha pagesat për fermerët do të mbyllen brenda vitit, ndërsa brenda vitit 2025 do të finalizohet edhe Banka e Zhvillimit, një instrument i ri për financimin e projekteve të sipërmarrjes dhe bujqësisë.
Ministri i Bujqësisë dhe Zhvillimit Rural, Andis Salla, prezantoi mekanizmin e ri të kompensimit prej 10% të vlerës së faturës për të gjithë fermerët që shesin prodhimet e tyre te grumbulluesit, përpunuesit apo agroturizmet.
Sipas tij, fatura do të lëshohet nga blerësi dhe fermerët do t’i paraqesin në tatime çdo gjashtë muaj, ku shteti do t’u kthejë automatikisht 10% të vlerës së faturave.
Ky mekanizëm, i përdorur edhe në vendet e BE-së, synon të forcojë formalizimin dhe të rrisë përfitimin e fondeve europiane për modernizimin e bujqësisë. Ministri theksoi se kjo është shkalla më e lartë e kompensimit në rajon.
Salla bëri të ditur se 5.2 miliardë lekë do t’i dedikohen vetëm skemës kombëtare të mbështetjes së fermerëve, një fond 16% më i lartë se buxheti fillestar i vitit aktual.
Ai shtoi se edhe pensionet rurale do të rriten ndjeshëm, duke kaluar nga 11,500 lekë aktualisht, në 18,000 lekë deri në vitin 2030, ndërsa rritja mujore do të nisë që prej janarit 2026, përveç indeksimit vjetor.
Takimi në Elbasan shënon nisjen e një cikli të ri konsultimesh me fermerët, ndërsa qeveria premton mbështetje të zgjeruar financiare, teknike dhe strukturore për bujqësinë, sektor që mbetet një prej prioritetëve kryesorë të zhvillimit ekonomik të vendit. /skyweb.al
