“Po të ma kishit bërë këtë pyetje 15 vjet më parë, do t’ju kisha thënë: ‘Absolutisht marrëzi. Është çështje gjenetike dhe këpucët nuk shkaktojnë asnjë problem’,” thotë Andrew Goldberg, specialist ortoped për shputën dhe kyçin e këmbës në spitalin Wellington në Londër. Megjithatë, mendimi i tij ndryshoi rrënjësisht pasi pa skanime 3D që tregonin se si duken këmbët e njerëzve ndërsa qëndrojnë brenda këpucëve.
Ai realizoi dy skanime të këmbëve të së njëjtës person: një herë zbathur dhe një herë me taka. Dallimi ishte i menjëhershëm. Me taka, gishtat ishin të ngjeshur, gishti i madh shfaqte shenja bunioni (deformim i kyçit në bazën e gishtit të madh), ndërsa gishtat e vegjël ishin të përkulur si kthetra, duke u kapur për të ruajtur ekuilibrin. Goldberg rekomandon ushtrime të thjeshta ditore për këmbët, si kapja e objekteve me gishtat e këmbëve, për t’i mbajtur ato fleksibël dhe për të forcuar muskujt.
“Mund ta imagjinoni që pas disa orësh këmbët fillojnë të dhembin dhe, sapo hiqni këpucët, gishtat kthehen në pozicionin normal,” shpjegon ai. “Por nëse vishni taka tetë orë në ditë, çdo ditë, për vite me radhë, indet fillojnë të ngurtësohen në atë pozicion.” Me kalimin e kohës, ky tension çon në shtrirje të indeve të buta, formim bunionesh, përkulje të përhershme të gishtave dhe, në fund, artrit nga konsumimi.
Sipas Goldbergut, të gjitha llojet e këpucëve ndikojnë deri diku në formën e këmbës, duke i afruar gradualisht gishtat me njëri-tjetrin dhe duke e ngushtuar profilin e saj. Këpucët e ngushta ose me majë e përkeqësojnë këtë efekt, veçanërisht duke pasur parasysh se shumë njerëz mbajnë këpucë më të vogla se numri i tyre i vërtetë.
Për ata që veshin shpesh taka, Goldberg këshillon ushtrime të përditshme të thjeshta, si kapja e objekteve me gishtat e këmbëve ose ecja zbathur mbi majat e gishtave për një minutë, për të ruajtur fleksibilitetin dhe forcën muskulore.
Në fund të fundit, thekson ai, çelësi është moderimi.
“Nëse i vishni takat për një darkë, nuk ka problem. Por mos i mbani gjithë ditën, çdo ditë. Dhimbja që ndjeni në fund të mbrëmjes pas një dite me taka nuk është aspak e çuditshme — thjesht po i shkaktoni shumë stres këmbës suaj të gjorë.” /Skyweb.al
