Hetimet e Prokurorisë së Posaçme për tenderët e Agjencisë Kombëtare të Shoqërisë së Informacionit kanë prodhuar një tjetër zhvillim të rëndësishëm. Burime konfirmojnë se GJKKO ka vendosur masën e pezullimit nga detyra për zëvendësdrejtorin e Policisë së Tiranës, Erion Ismaili.
Masa ndaj tij jepet në kuadër të të njëjtit hetim që po zbatohet për tenderat e AKSHI-t, një dosje që prej gati një viti ka qenë në fokusin e SPAK për shkak të dyshimeve për parregullsi të thella në 12 procedura prokurimi.
Bazuar në të dhënat e deritanishme, masat e sigurisë të dhëna nga GJKKO janë si vijon:
• Arrest me burg për biznesmenin Ergys Agasi.
• Arrest shtëpie për drejtoreshën e AKSHI-t, Mirlinda Karçanaj.
• Arrest me burg për biznesmenin Ermal Beqiri, pronar i “Soft & Solution”.
Përveç tyre, janë vendosur masa sigurie edhe për zyrtarë të Komisioneve të Vlerësimit të Ofertave dhe Komisionit të Shqyrtimit të Ankesave në AKSHI, ndërsa disa emra ende nuk janë bërë publikë.
Sipas hetimeve, personat e përfshirë akuzohen për një sërë veprash penale, përfshirë:
• Shkelje të barazisë në tendera
• Korrupsion
• Shpërdorim detyre
• Pastrim parash
Hetimi i SPAK ka zbuluar se tenderat dyshohet të jenë paracaktuar, ndërsa procedurat teknike dhe financiare janë manipuluar në favor të operatorëve të caktuar. Në qershor, gjatë një kontrolli të gjerë, hetuesit sekuestruan shtatë telefona që rezultuan të përmbanin biseda dhe komunikime të rëndësishme mbi tenderat e institucionit.
Aksioni pritet të zgjerohet, ndërsa SPAK po finalizon zbardhjen e përgjegjësive për çdo zyrtar të përfshirë në një nga çështjet më të rëndësishme të korrupsionit në sektorin e teknologjisë së viteve të fundit.
