Një raport i ri tregon se sëmundjet kardiovaskulare vazhdojnë të jenë shkaku kryesor i vdekjes dhe paaftësisë në Europë. Çdo vit thuhet se rreth 1.7 deri në 2 milionë njerëz humbin jetën për shkak të këtyre sëmundjeve, që prekin zemrën dhe enët e gjakut, si ataku në zemër, goditjet në tru dhe dështimet kardiake.
Sëmundjet kardiovaskulare ndikojnë gjithashtu në cilësinë e jetës për miliona njerëz të tjerë, duke kufizuar aftësitë fizike dhe duke shkaktuar lodhje, frikë nga përkeqësimi i gjendjes dhe nevojë për trajtim afatgjatë. Raporti evidenton se në shumë vende europiane vdekshmëria e këtyre sëmundjeve është më e lartë te meshkujt sesa te femrat dhe se ka dallime të dukshme mes shteteve të ndryshme.
Përtej kostos njerëzore, këto sëmundje kanë një ndikim të madh ekonomik. Vlerësohet se krijojnë një barrë të konsiderueshme financiare, duke kushtuar shëndetësisë dhe ekonomive kombëtare rreth 282 miliardë euro në vit, për shkak të shpenzimeve direkte për trajtime, humbjeve të produktivitetit dhe kujdesit joformal që familjet duhet të ofrojnë.
Raporti nënvizon nevojën për masa më të forta parandaluese dhe për një plan gjithëpërfshirës që synon të reduktojë numrin e të prekurve dhe vdekjeve nga sëmundjet kardiovaskulare në të gjithë Europën.
