Shqipëria nuk do ta zgjasë ndalimin njëvjeçar të TikTok-ut, ka deklaruar kryeministri Edi Rama në një intervistë për “Politico”, duke vlerësuar bashkëpunimin e fundit me platformën e mediave sociale.
“Pas takimeve konstruktive me platformën, jemi të kënaqur me rezultatin,” tha Rama, duke shtuar se është krijuar një partneritet dhe se në javët ose muajt në vijim qytetarët do të informohen për planin e dakordësuar, ashtu siç ishte premtuar.
Kryeministri u shpreh se ishte i befasuar pozitivisht nga reagimi i TikTok-ut pas vendimit fillestar të qeverisë shqiptare për ta ndaluar platformën. “Në fillim menduam se do të na kundërshtonin, do të hakmerreshin apo do të përpiqeshin të na intimidonin. I takova personalisht dhe mbeta shumë i impresionuar nga qëndrimi i tyre,” tha Rama, duke theksuar se përfaqësuesit e TikTok-ut dëgjuan me kujdes shqetësimet e palës shqiptare. Ai i bëri këto komente në kuadër të samitit BE–Ballkani Perëndimor.
Nga ana tjetër, TikTok nuk iu përgjigj menjëherë kërkesës së “Politico” për koment.
Shqipëria, vend kandidat për anëtarësim në Bashkimin Europian, vendosi ndalimin e TikTok-ut në mars të vitit 2025, pas afro një viti diskutimesh me kompaninë lidhur me abuzimet online, përfshirë raste të rënda bullizmi që dyshohet se çuan edhe në dy vetëvrasje. Vendimi erdhi pas një ngjarjeje të rëndë, ku një 14-vjeçar humbi jetën pas një goditjeje me thikë pranë shkollës, si pasojë e një konflikti të nisur online. Pas kësaj, qeveria urdhëroi ofruesit e shërbimeve të internetit të bllokonin aksesin në TikTok, si në versionin desktop ashtu edhe në aplikacionet mobile.
Ky vendim u shoqërua me reagime të forta nga partitë opozitare dhe organizatat e shoqërisë civile, të cilat e akuzuan qeverinë për censurë dhe kufizim të lirisë së shprehjes politike në internet.
Rama tha se ndalimi ka shërbyer për ndërtimin e një marrëdhënieje më të strukturuar me TikTok-un dhe për vendosjen e disa masave mbrojtëse që më parë nuk ekzistonin. Megjithatë, raportimet e mediave vendase sugjerojnë se ndalimi pati ndikim të kufizuar në uljen e dhunës në shkolla apo të dhunës digjitale.
Ndërkohë, Shqipëria nuk pritet të mbështesë kufizime të përgjithshme për përdorimin e rrjeteve sociale nga të miturit, një temë që po diskutohet aktualisht në disa vende të BE-së dhe në Bruksel. Rama e cilësoi këtë ide si të papranueshme, duke thënë se nuk funksionon, edhe pse qeveria e tij e ka shqyrtuar si çështje.
“Nëse nuk ke informacion të plotë për atë që fshihet pas këtyre platformave, gjithmonë do të jesh viktimë e sulmeve nga trollët dhe robotët,” tha kryeministri, duke ritheksuar se objektivi i Shqipërisë mbetet anëtarësimi në Bashkimin Europian deri në vitin 2030. /skyweb.al
