Drafti e përcakton Policinë Bashkiake si institucion me status të veçantë, me mision ruajtjen e sigurisë, qetësisë dhe rendit në komunitet, administrimin e hapësirave publike si dhe mbrojtjen e mjedisit.
Riorganizimi parashikohet në dy nivele, Drejtoria e Përgjithshme në nivel qarku dhe Drejtoritë Vendore në bashki, ndërsa ministri përgjegjës do të nxjerrë udhëzime të detyrueshme për unifikimin dhe standardizimin e procedurave në të gjithë territorin.
Projektligji i jep Policisë Bashkiake kompetenca të detajuara për problematika të përditshme, që nga masat ndaj zhurmave dhe kontrolli i ndalimit të duhanit në transportin publik dhe ambiente të përbashkëta, deri te ruajtja e hapësirës publike, parqeve, lulishteve dhe monumenteve.
Parashikohet edhe roli për evidentimin e ndërtimeve të kundërligjshme, me detyrimin për të njoftuar strukturat urbanistike të bashkisë ose inspektoratin përkatës për vijimin e procedurave ligjore.
Në kapitullin që lidhet me rendin dhe sigurinë publike, punonjësit e Policisë Bashkiake mund të kontrollojnë identitetin në rastet e kundërvajtjeve administrative ose kur ka dyshime për cenim të rendit, si dhe mund të kërkojnë ndihmën e Policisë së Shtetit në rastet e nevojshme.
Në situata që lidhen me rendin dhe sigurinë publike, fatkeqësi natyrore apo aksidente, Policia Bashkiake mund të vendosë punonjës dhe mjete për bllokimin e përkohshëm të një pjese të rrugëve ose mjediseve publike brenda juridiksionit të bashkisë.
Projektligji, i hartuar nga Ministria e Brendshme dhe ministria përgjegjëse për pushtetin vendor, rregullon edhe mënyrën e rekrutimit. Vendet e lira do të shpallen në një portal unik, ndërsa procesi përfshin verifikim, test me shkrim, test fizik dhe intervistë, me një vlerësim maksimal prej 100 pikësh dhe listë fituesish të vlefshme për një periudhë njëvjeçare.
Sipas draftit, objektivat kryesore janë unifikimi i funksioneve të Policisë Bashkiake në rang kombëtar, sqarimi i kompetencave në terren dhe forcimi i koordinimit me institucionet e tjera për garantimin e rendit dhe sigurisë në komunitet. /skyweb.al
