Jo vetëm Ergys Agasi, por edhe sasia e konsiderueshme e verës në pronësi të tij, me një vlerë tregu të përllogaritur rreth 3 milionë euro, është zhdukur pa lënë gjurmë gjatë natës në Tiranë.
Ngjarja po hetohet nga organet e drejtësisë dhe lidhet me persona tashmë nën hetim nga SPAK në dosje të tjera penale.
Mësohet se gjatë kontrollit në banesën e familjes Agasi, hetuesit e Byrosë Kombëtare të Hetimit konstatuan një kantinë me verëra super të shtrenjta.
Duke qenë se vera dyshohej se ishte mall kontrabandë, sipas procedurës u njoftua Drejtoria e Doganave. Punonjësit doganorë kryen inventarizimin për disa orë dhe përllogariten një dëm të madh për buxhetin e shtetit nga mospagimi i akcizës.
Për shkak se kontrolli u krye gjatë natës dhe transporti i mallit nuk ishte i mundur, vera u la në ruajtje në ambientet e vilës. Në raste të tilla, malli i dyshuar kontrabandë duhet të ruhet nga Policia e Shtetit dhe punonjësit e doganave. Rrjedhimisht, Policia e Shtetit dhe Drejtoria e Përgjithshme janë përgjegjëse për humbjen e verës.
Ngjarja e mistershme i jep krahë spekulimeve për kontrollin e Agasit ndaj kupolës së Policisë së Shtetit dhe Gent Gazhelit.
Sipas të njëjtave burime, gjatë natës dyshohet se Eno Agasi, i afërm i Ergys Agasit, ka larguar të gjithë sasinë e verës nga kantina. Po ashtu, dyshohet se janë hequr edhe serverat e kamerave të sigurisë. Të nesërmen, kur autoritetet doganore janë rikthyer në banesë për të vijuar procedurat, kantina është gjetur plotësisht e boshatisur.
Prokuroria e Tiranës ka shpallur në kërkim Eno Agasin, i cili akuzohet për veprime që pengojnë zbardhjen e së vërtetës, kontrabandë mallrash dhe pastrim parash. Sipas hetimeve, ai dyshohet si personi që ka zhdukur verën nga kantina e Ergys Agasit.
Ngjarja zhvillohet në një kontekst më të gjerë hetimesh ndaj rrethit të Ergys Agasit. Mediat kanë raportuar më herët për lidhje të tij me zyrtarë të Policisë së Shtetit, përfshirë edhe zv.drejtorin e Policisë së Tiranës, i cili ndodhet nën masë sigurie nga SPAK, i dyshuar si pjesë e një grupi kriminal.
Janë kryer kontrolle edhe ndaj zyrtarëve të tjerë të lartë të policisë.
Po ashtu, Ergys Agasi dhe biznesmeni Ermal Beqiraj dyshohet se kanë marrë peng një biznesmen tjetër, duke e kërcënuar që të hiqte dorë nga ankimimet për tenderët e AKSHI-t. Për këtë dosje, në hetim nga SPAK kanë përfunduar edhe drejtuesja e AKSHI-t, Mirlinda Karçanaj, dhe zëvendësja e saj, Hava Delibashi, të dyja nën masë arresti në shtëpi. /skyweb.al
