Agjencisë së Inteligjencës Financiare (AIF) ka hedhur dritë mbi praktika të sofistikuara të pastrimit të parave në Shqipëri përmes kompanive të reja me aksionerë të huaj, jo-rezidentë në vend.
Sipas raportit vjetor të vitit të shkuar, dy shtetas të huaj, bashkëshortë, të identifikuar si A dhe B, kanë hyrë në Shqipëri në vitin 2024 dhe kanë regjistruar secili nga tre shoqëri tregtare me objekt “shërbime të konsulencës dhe marketingut online”.
Të gjashta këto kompani ndodhen në të njëjtën adresë fizike dhe nuk kanë asnjë lidhje të dukshme me tregun shqiptar.
Në emër të tyre, është autorizuar një shtetase shqiptare, e identifikuar si M, për të përfaqësuar kompanitë në veprimet bankare dhe ligjore. Menjëherë pas themelimit, kompanitë kanë hapur disa llogari bankare në një bankë të nivelit të dytë në Shqipëri. Nga analizat financiare të realizuara nga AIF, vetëm dy kompani – të identifikuara si Shoqëria X dhe Shoqëria Y – kanë qarkulluar fonde në mënyrë aktive.
Shoqëria X ka marrë gjatë vitit 2024 rreth 100,000 euro nga kompani të ndryshme në vende si Polonia dhe Hungaria, me justifikimin e pagesës së faturave për shërbime marketingu. Këto fonde janë transferuar më pas në favor të disa kompanive të huaja me seli në juridiksione të njohura për lehtësira fiskale, si Belize, Seychelles, Qipro dhe Singapor. Mes përfituesve rezulton të ketë qenë edhe një kompani që merrej me prodhim dhe eksportim të lëndëve drusore – një veprimtari që nuk ka lidhje të qartë me fushën e marketingut.
Nga ana tjetër, Shoqëria Y ka përfituar rreth 200,000 euro nga subjekte në një shtet fqinj, gjithashtu për shërbime marketingu. Edhe në këtë rast, fondet janë transferuar më tej drejt juridiksioneve si Gjibraltari, Malta, Irlanda dhe sërish Qipro, nën pretendimin e likuidimit të faturave për shërbime konsulence.
Verifikimet e kryera treguan se asnjë nga kompanitë nuk ka deklaruar fatura shitblerjeje në sistemin tatimor shqiptar dhe nuk punëson staf tjetër përveç administratorëve. Veprimtaria ekonomike e tyre rezulton praktikisht e padukshme në Shqipëri, përtej qarkullimit të fondeve në llogaritë bankare.
Duke u mbështetur në disa elementë kyç – përfshirë regjistrimin e kompanive nga shtetas jo-rezidentë, mungesën e aktivitetit të dukshëm në vend, transfertat e menjëhershme drejt juridiksioneve të dyshimta dhe mospërputhjen e deklarimeve me realitetin financiar – AIF ka vendosur t’ia referojë rastin për hetime të mëtejshme organeve të zbatimit të ligjit. /skyweb.al
