Ryanair ka njoftuar se do të tërhiqet plotësisht nga Aeroporti Maastricht Aachen në tetor të këtij viti, duke pezulluar të gjitha fluturimet nga kjo pikë dhe duke akuzuar qeverinë holandeze se po e përjashton veten nga tregu i aviacionit me kosto të ulët për shkak të rritjes së taksave dhe tarifave aeroportuale.
Sipas kompanisë, që prej vitit 2021 taksat për pasagjerët janë rritur me 275%, duke arritur gati në 30 euro për biletë. Ryanair e cilësoi gjithashtu si “ekstreme” koston lokale të operimit në aeroport, duke e renditur Maastrichtin ndër më të shtrenjtat në Europë. “Kjo e bën krejtësisht të paqëndrueshme ekonomikisht,” u shpreh zëvendësdrejtori ekzekutiv i Ryanair, Jason McGuinness.
Aktualisht, Ryanair operon nga Maastricht drejt destinacioneve si Alicante, Girona, Bari, Porto dhe Zadar, por vetëm linja për Alicante është funksionale gjatë gjithë vitit. Të gjitha këto fluturime do të ndalojnë më 26 tetor.
Menaxhmenti i aeroportit, i cili në vitin 2022 i shpëtoi mbylljes për pak, reagoi ashpër ndaj largimit të kompanisë. “Ryanair thjesht refuzoi të paguante tarifa të qëndrueshme. Politika e tyre nuk është në përputhje me objektivin tonë për të arritur bilanc pozitiv deri në vitin 2027,” deklaroi një zëdhënës i aeroportit.
Pas largimit të Ryanair, kompania Corendon mbetet e vetmja linjë ajrore që ofron fluturime të rregullta turistike nga Maastricht, të paktën për momentin. /skyweb.al
