Prokuroria e Fierit ka reaguar zyrtarisht lidhur me operacionin e djeshëm që çoi në arrestimin e disa drejtuesve të lartë të kompanisë “Bankers Petroleum Albania Ltd”, përfshirë CEO-n aktual Hongping Xiao dhe ish-drejtorin Leonidha Çobo.
Sipas Prokurorisë, hetimi që ka nisur në dhjetor 2024 pas referimit nga Drejtoria e Hetimit Tatimor, ka zbuluar një skemë të qëndrueshme mashtrimi tatimor që daton prej vitit 2004. Nëpërmjet deklarimeve fiktive dhe rritjes artificiale të shpenzimeve, “Bankers Petroleum” ka rezultuar çdo vit me humbje, duke shmangur tatimin mbi fitimin dhe përfituar rimbursime të pajustifikuara nga TVSH-ja.
20 vjet humbje, mbi 500 miliardë lekë xhiro
Sipas të dhënave zyrtare, kompania ka realizuar shitje dhe eksporte në vlerën mbi 532 miliardë lekë nga viti 2004 deri më 2024, kryesisht në zonën naftëmbajtëse Patos-Marinëz. Megjithatë, për 20 vite rresht ajo ka deklaruar humbje dhe nuk ka derdhur në asnjë rast tatim mbi fitimin në buxhetin e shtetit. Dyshohet se dëmi i shkaktuar është në dhjetëra milionë euro.
Hetimet kanë zbuluar se deklaratat tatimore janë manipuluar përmes faturave të falsifikuara dhe operacioneve financiare me kompani fiktive apo të lidhura, brenda dhe jashtë vendit. Përveç drejtuesve kryesorë të kompanisë, masat e sigurisë përfshijnë edhe punonjës me funksione të larta menaxheriale, si dhe pesë persona të tjerë, kryesisht shtetas të huaj, që janë shpallur në kërkim.
Prokuroria thekson se “Bankers Petroleum” ka qenë e ndihmuar në këtë skemë nga një rrjet kontraktorësh, kompani të tjera private dhe individë, që ofronin dokumentacion mbështetës të falsifikuar për shpenzime të parealizuara. Objektivi ishte i qartë: të shmangnin detyrimet tatimore dhe të përfitonin në mënyrë të padrejtë rimbursime të mëdha.
Arrestimet dhe kontrollet në ambientet e kompanisë dhe në banesat e të dyshuarve janë kryer për të parandaluar fshirjen e provave dhe për të ndaluar vijimin e aktivitetit të paligjshëm.
Prokuroria thotë se hetimet do të thellohen, pasi ekzistojnë dyshime për disa skema mashtruese të ndara që përfshijnë operatorë të tjerë në tregun energjetik dhe të naftës. /skyweb.al
