Sektorët e ekonomisë të lidhur me turizmin kanë perfomuar pozitivisht gjatë këtij viti.
Të dhënat e 7-mujorit 2025, krahasuar me të njëjtën periudhë të një viti më parë flasin për rritje të qarkullimit më sektorë si akomodimi, bar-restorantet apo shërbime të tjera në funksion të turizmit.
Në total bizneset e lidhura me sektorin e turizmit deri në muajin Korrik, kanë qarkulluar afro 929.2 milionë euro, apo 109.9 milionë euro më shumë se janar-korrik 2024.
Konkretisht përgjatë periudhë janar-korrik, xhiroja e deklaruar nga sektori i restoranteve dhe shërbimeve ushqimore, regjistrohet në 456.7 milionë euro. Në raport me një vit më parë rezulton një kapërcim prej 50.3 milionë euro.
Nga ana tjetër hotelet dhe strukturat akomoduese siç janë bujtinat apo qiratë ditore kanë raportuar një xhiro 331.5 milionë euro, duke regjistruar një rritje prej 43.1 milionë euro në raport me 7 mujorin e 2024-ës.
Bizneset e tjera turistike kanë qarkulluar 136.5 milionë euro në janar-korrik 2025, me rritje prej 16.5 milionë euro në raport me vitin e kaluar.
Ky vit është shoqëruar me një rritje të ndjeshme të konsumit nga ana e qytetarëve shqiptarë por edhe turistëve të huaj që vizitojnë vendin tonë. Tregues për këtë janë edhe të ardhurat e mbledhura nga Tatimi mbi Vlerën e Shtuar nga administrata tatimore, çka tregon qarkullimin e produkteve dhe shërbimeve brenda vendit përmes faturave fiskale dhe 20% e paguar nga konsumatorët.
Përgjatë periudhës Janar-Korrik, tatimet kanë mbledhur nga TVSH e brendshme afro 39.2 miliardë lekë, apo 392 milionë euro.
Krahasuar me të njëjtën periudhë të një viti më parë, ku u arkëtuan 327 milionë euro nga ky zë, ka një rritje prej 65 milionë euro, e cila për ekonominë shqiptare, nuk është e vogël.
Numri i hyrjeve gjithsej i shtetasve shqiptarë dhe të huaj për 7-mujorin e parë të vitit regjistrohet në 11.2 milionë. /tvscan
