Pagat në Shqipëri vijojnë të rriten, të udhëhequra kryesisht nga administrata publike. Sipas të dhënave më të fundit të INSTAT, gjatë tremujorit të dytë të vitit 2025 paga mesatare mujore bruto për një të punësuar arriti në 83.906 lekë, me një rritje prej 11,7% krahasuar me të njëjtën periudhë të një viti më parë.
Krahasuar me tremujorin e parë të këtij viti, rritja ishte rreth 2%.
Të dhënat tregojnë se administrata publike, sigurimet shoqërore, arsimi, shëndetësia dhe aktivitetet e punës sociale shënuan rritjen më të madhe të pagave, me 16,9% brenda një viti.
Në të kundërt, aktivitetet financiare dhe të sigurimit regjistruan rritjen më të vogël, vetëm 5,3%.
Nga ana e profesioneve, më të paguarit mbeten menaxherët, ligjvënësit, drejtorët ekzekutivë dhe profesionistët me arsim të lartë.
Ndërkohë, forcat e armatosura dhe specialistët e kualifikuar shënuan rritjen më të madhe të pagës, përkatësisht 23,2% dhe 13,6%, ndërsa tek drejtuesit rritja ishte më e moderuar, rreth 8,8%.
Një tjetër element i rëndësishëm është ulja e numrit të punonjësve me pagë minimale dhe shtimi i atyre me paga mesatare dhe të larta.
Sipas INSTAT, shpërndarja e të punësuarve është bërë më e balancuar, duke reflektuar një zhvendosje të qartë drejt kategorive të mesme dhe të larta të pagës.
Paga mesatare mujore bruto përfshin jo vetëm pagën bazë, por edhe shtesat për funksione drejtuese, vjetërsi në punë apo vështirësi të veçanta. Ky ndryshim tregon se reforma e pagave në sektorin publik po ndikon ndjeshëm edhe në statistikat e përgjithshme të tregut të punës. /skyweb.al
