Shqipëria po përjeton një ndryshim të dukshëm në tregun e automjeteve të përdorura. Sipas të dhënave të publikuara nga Drejtoria e Përgjithshme e Shërbimeve të Transportit Rrugor, gjatë periudhës janar–gusht 2025 janë regjistruar për herë të parë 66,521 mjete, ku pjesa më e madhe e tyre vijnë nga Koreja e Jugut.
Të dhënat tregojnë se 21% e mjeteve të regjistruara rishtazi kanë origjinë koreane, duke e vendosur këtë shtet në krye të listës. Në vend të dytë renditet Italia me 15.9%, ndërsa Gjermania, që tradicionalisht kryesonte tregun, ka zbritur në vend të tretë me 15.4%. Pas tyre vijnë Zvicra me 8.5%, SHBA me 8.2% dhe Kina me 8%.
Krahas regjistrimeve të reja, DPSHTRR njofton se është rritur edhe numri i çregjistrimeve të përhershme të mjeteve. Vetëm në tetë muajt e parë të vitit, janë çregjistruar përgjithmonë 5,333 automjete, një rritje prej 17.6% krahasuar me vitin 2024. Ky proces konsiderohet i rëndësishëm për përmirësimin e sigurisë rrugore dhe uljen e ndotjes mjedisore.
Ky zhvillim tregon një ndryshim të qartë të preferencave të shqiptarëve për markat e automjeteve, duke shtuar praninë e makinave koreane në rrugët e vendit, ndërkohë që dominimi i gjatë i makinave gjermane duket se po zbehet. /skyweb.al
