Paga mesatare në sektorin privat gjatë vitit 2024 ishte 22.7% më e ulët se në sektorin shtetëror, duke thelluar ndjeshëm diferencën krahasuar me vitin 2023 (19.9%) dhe vitin 2022 (16.3%).
Sipas të dhënave të INSTAT, punonjësit e administratës publike fituan mesatarisht 92,069 lekë bruto në muaj, me një rritje prej 12.4% në krahasim me një vit më parë. Në të kundërt, paga mesatare bruto në sektorin privat arriti në 71,179 lekë, duke u rritur me 8.5% krahasuar me 2023. Diferenca mes dy sektorëve në vitin 2024 arriti 20,890 lekë në favor të administratës.
Hendeku i pagave është thelluar kryesisht për shkak të rritjes së fortë të pagave në administratën publike, ndërkohë që bizneset private, sidomos ato të vogla e të mesme, janë përballur me kosto të larta operative nga inflacioni dhe shtrenjtimi i burimeve, duke mos arritur të ndjekin të njëjtin ritëm.
Të dhënat për periudhën 2014–2024 tregojnë një rritje të vazhdueshme të pagave në të dy sektorët, por me ritme të ndryshme.
Në vitin 2014 paga mesatare në shtet ishte 53,025 lekë, ndërsa në privat 41,970 lekë, hendek prej 20.8%. Në vitin 2018 paga mesatare në shtet 61,023 lekë, në privat 45,759 lekë, me diferencë 25%. Në vitin 2022 hendeku ra në nivelin më të ulët të dekadës, vetëm 16.8%, për shkak të rritjes më agresive të pagave në sektorin privat, të nxitur nga emigracioni dhe kërkesa për fuqi punëtore.
Në vitin 2023 hendeku u rrit sërish në 19.9%. ndërsa në vitin 2024, diferenca arriti 22.7%, niveli më i lartë i viteve të fundit.
Në vitin 2024, qeveria ndërmori një nga rritjet më të mëdha të pagave në administratë gjatë dekadës së fundit, në kuadër të reformës së pagave. Qëllimi ishte të tërhiqte dhe mbante profesionistë në sektorë strategjikë si arsimi, shëndetësia, drejtësia dhe siguria kombëtare.
Ndërkohë, sektori privat, edhe pse ka njohur rritje të pagave, mbetet prapa për shkak të kufizimeve financiare dhe presioneve të tregut, duke e lënë hendekun me sektorin publik më të thelluar se kurrë më parë. /Skyweb.al
