Shtimi i flukseve të turistëve të huaj vijon të nxisë rritjen e kërkesës së bizneseve për punësime sezonale përgjatë sezonit turistik.
Vetëm në qarkun e Durrësit dhe të Vlorës ku është i përqendruar një numër i lartë i strukturave akomoduese apo resortet, për muajin gusht sipas të dhënave të administratës tatimore u punësuan rreth 7,292 punonjës sezonalë apo 67% më shumë sesa numri i të punësuarve të muajit dhjetor.
Sipas Tatimeve, numri i punonjësve sipas listëpagesës së muajit Dhjetor 2024 për tatimpaguesit që zhvillojnë aktivitet në sektorin e turizmit, në qarkun Durrës është 7,466 punonjës dhe në qarkun Vlorë 3,404 punonjës apo në total prej 10,870 të punësuarve në turizëm.
Ndërsa numri i punonjësve sipas listëpagesës së muajit Gusht 2024 për tatimpaguesit që zhvillojnë aktivitet në sektorin e turizmit në qarkun Durrës është 10,871 punonjës dhe në qarkun Vlorë 7,291 punonjës apo total prej 18,162 të punësuarish.
Sakaq sipas të dhënave zyrtare, në të gjithë territorin e Shqipërisë janë identifikuar 19,115 tatimpagues që operojnë në sektorin e turizmit sezonal, kryesisht në muajt qershor–shtator.
Përveç kërkesës së bizneseve për punonjës në muajt e sezonit turistik, një faktor që ka ndikuar në rritjen e punësimeve sezonale janë edhe pagat e larta që ofrohen, veçanërisht nga restorantet dhe baret.
Përgjatë sezonit turistik 2025, sipas të dhënave të agjencive të punësimeve epiqendra e ofertës me rrogat më të larta për punësimin sezonal ishte Dhërmiu. Nga bizneset u kërkuan punëtore për pozicione të ndryshme me paga nga 120 mijë lekë deri në 250 mijë lekë në muaj. Pozicioni më i paguar ishte për shef kuzhine dhe kuzhinier sushi, me pagë maksimale nga 220 mijë deri në 250 mijë lekë në muaj. Më pak i paguari krahasuar me pozicionet e tjera në Dhërmi është shefi i sallës me pagë mujore nga 120 mijë lekë deri 150 mijë lekë.
Oferta pune me paga të larta sivjet pati edhe nga bizneset në Vlorë, Qeparo, Sarandë, Ksamil dhe ato në zonën e Shkëmbit të Kavajës, me paga që arritën deri në 2,000 euro për pozicionin e picierit në Qeparo dhe Vlorë dhe menaxher hoteli në Shkëmbin e Kavajës me pagë deri në 200 mijë lekë në muaj. /Monitor
