Një grup prej 26 organizatash ndërkombëtare dhe shqiptare për lirinë e medias dhe shoqërinë civile i kanë dërguar një letër të hapur Kryetarit të Kuvendit, Niko Peleshi, dhe drejtuesve të grupeve parlamentare, duke shprehur shqetësim të thellë për planet e shumicës për të kufizuar aksesin e gazetarëve në Parlament.
Sipas organizatave, planet e reja parashikojnë heqjen e mundësisë për filmime të pavarura dhe kufizimin e kontakteve spontane të gazetarëve me deputetët dhe ministrat.
Ky veprim, sipas tyre, do të dëmtonte rëndë transparencën dhe lirinë e informimit.
Në letrën e përbashkët theksohet nevoja për të ruajtur qasjen reale të gazetarëve në Kuvend, për të shmangur praktikat që ndalojnë pyetjet e drejtpërdrejta dhe për të respektuar standardet europiane të lirisë së medias, si një pjesë e rëndësishme e angazhimeve të Shqipërisë në procesin e integrimit në Bashkimin Europian.
Organizatat paralajmërojnë se çdo kufizim i tillë do të ishte një hap i rrezikshëm prapa për demokracinë dhe llogaridhënien publike në vend.
