Komisioneri Shtetëror i Zgjedhjeve pritet të miratojë të hënën vendimin për shpërndarjen e fondeve publike për partitë politike që morën pjesë në zgjedhjet e 11 majit. Sipas llogaritjes, çdo votë e fituar do të shpërblehet me 94 lekë nga buxheti i shtetit.
Partitë më të mëdha, PS dhe PD, përfitojnë edhe fondet më të larta. Partia Socialiste përfiton gjithsej 80,448,114 lekë, ndërsa Partia Demokratike 49,687,648 lekë. Të dyja partitë kishin marrë një paradhënie para zgjedhjeve, përkatësisht PS 65,291,390 lekë dhe PD 44,818,545 lekë, ndaj pjesa e mbetur e fondit do t’u shpërndahet subjekteve të tjera.
Nga partitë e reja, më e favorizuara është “Mundësia” e Agron Shehajt, e cila përfiton 4,601,488 lekë. Pas saj vjen Partia “Lëvizja Shqipëria Bëhet” me 3,884,362 lekë, ndërsa Lëvizja “Bashkë” përfiton 2,307,418 lekë. Koalicioni Euroatlantik i drejtuar nga Lulzim Basha do të marrë 1,963,190 lekë.
Ligji parashikon kompensim paszgjedhor për subjektet që nuk morën fonde paradhënie por arritën të kalojnë pragun minimal prej 1% të votave. Përveç kësaj, partitë parlamentare përfitojnë edhe mbështetje shtesë nga buxheti i shtetit për selitë e tyre, si dhe logjistikë me zyra dhe staf në nivel bashkiak për formimin e grupeve parlamentare. /skyweb.al
